Taulant Balla, kreu i deputetëve socialistë, ka sulmuar nga salla e Kuvendit, gjyqtarët dhe prokurorët që sipas tij, duke e ditur që nuk do të kalojnë vettingun janë kthyer në një bandë.
Balla theksoi se këto janë pjesë e asaj bande të papranueshme “KÇK”, për të cilën duhet gjetur mekanizmi për t’a parandaluar.
“Kush u mundua të pengonte Reformën në Drejtësi e ka marrë sot mesazhin e qartë nga suksesi i këtij procesi, i cili padyshim është vetëm në fillimin e vet. Dua ta ritheksoj se ka ende prokurorë e gjyqtarë, të cilët e dinë fare mirë që nuk e kalojnë procesin e vettingut, por janë bërë pjesë e asaj bande të papranueshme “KÇK”, për të cilën duhet gjetur mekanizmi për ta parandaluar”, tha Balla.
Ai nuk ka përmendur emra konkretë, por deklarata është e njëjtë me atë të Kryeministrit Edi Rama pak ditë më parë nga e njëjta sallë dhe foltore, ku sulmoi prokurorin e Durrësit, Arjan Ndoja, të cilit tre ditë më parë iu bë edhe një atentat me armë, teksa udhëtonte me makinë në drejtim të Tiranës.
Në anën tjetër, Balla ka paralajmëruar edhe Presidentin Ilir Meta, lidhur me plotësimin e vendeve në Gjykatën Kushtetuese.
“Ne kemi në proces në Kuvendin e Shqipërisë kandidaturat që i takojnë Kuvendit për Gjykatën Kushtetuese.
Komisioni i Çështjeve Ligjore po bën një procedurë siç e përcakton Kushtetuta dhe brenda afatit 30 ditor që Kuvendi ka, padyshim do të ezaurojë të drejtën për të zgjedhur 1/3 e anëtarëve të Gjykatës Kushtetuese.
Besoj përpara Krishtlindjeve, Kuvendi do të plotësojë tre vendet që i takojnë, sikurse edhe Presidenti i Republikës duhet të veprojë sipas Kushtetutës brenda afateve të përcaktuara”, tha Balla.
Aktualisht Presidenti ka caktuar një prej anëtarëve të Gjykatës Kushtetuese dhe i takojnë edhe dy vende, ndërsa Kuvendi duhet të zgjedhë 3 anëtarët e tij, nga emrat që janë propozuar nga KED.
