Përzgjedhja e kandidatëve për kryetarë bashkie në zgjedhjet vendore të 30 qershorit duket se po shkakton përplasje mes grupimeve në Partinë Socialiste.
E ndërsa në disa prej bashkive kryesore duket se Edi Rama, kryeministër dhe kryetar i PS-së, ka vënë veton duke paracaktuar kandidatët përpara se të shpreheshin asambletë e degëve, në disa të tjera janë refuzuar kandidatët që dalin nga propozimet e strukturave lokale.
Kështu raportohet për të paktën dy bashki në Qarkun e Durrësit. Si për Bashkinë e Durrësit ashtu edhe për atë të Shijakut, pritet që socialistët të garojnë kandidate femra.
Kjo ka bërë që kandidati Spartak Kovaçi, drejtori actual i Ujësjellësit të Durrësit, të tërhiqet nga gara, ndërsa në skenë dolën dy emra, Milva Ekonomi dhe Klodiana Spahiu.
Por një tjetër kandidaturë i është bashkuar dy deputeteve socialiste. Ajo është Ana Dhamo, këshilltare e PS-së. Madje është raportuar se mbrëmjen e djeshme, kryeministri Rama ka zhvilluar një takim me deputetin Lefter Koka, i cili nuk dorëzoi mandatin e ligjvënësit, ashtu si kolegët e tij në opozitë të PD dhe LSI. Nuk dihet nëse emri i Dhamo është një propozim i Kokës apo jo.
Pothuajse e njëjtë si në rastin e Durrësit, ka ndodhur edhe me Bashkinë e Shijakut. Asamblea e socialistëve ka propozuar tre emra: Elton Arbana (kryetar i PS dega Shijak), Ardian Kokomani ( Kryetar aktual i Bashkisë Shijak) dhe Elton Varaku (Drejtor i Bordit të Kullimit, Rajoni Durrës).
Por asnjë prej emrave të propozuar nuk është pranuar nga Rama. Burime nga PS shprehen se strukturave vendore të PS dhe të deleguarve, i është kërkuar të përzgjedhin një kandidaturë tjetër, duke vënë si kusht që ajo duhet të jetë femër.
Në kushtet kur opozita nuk është regjistruar si pjesëmarrëse për zgjedhjet e 30 qershorit, ndërsa ka paralajmëruar se nuk do të ketë proces zgjedhor, duket se Rama po përpiqet të garojë me sa më shumë kandidate femra, ndoshta në një përpjekje për të rregulluar imazhin e një procesi të njollosur pa u zhvilluar.
