Aktualisht janë 10 protestues që mbahen në burg me vendime gjykatash për shkak se kanë marrë pjesë në protestat e opozitës, ndaj i kam quajtur të burgosur politikë.
Kështu u shpreh Sekretari i Përgjithshëm i PD-së, Gazmend Bardhi, duke shtuar se Edi Rama synon që të trembë shqiptarët që janë ngritur në protesta kundër tij.
“Ata protestues janë heronj, pasi janë në burg jo për pushtetin e opozitës, por për të shpëtuar demokracinë në Shqipëri. Asnjë nga protestuesit që ndodhen në burg, nuk ka kryer asnjë akt dhune, nuk ka asnjë provë që këta individë të kenë kundërshtuar forcat e rendit, apo të kenë kryer akte dhune. E vetmja provë janë raporte shërbime të disa punonjësve të korruptuar të Policisë së Shtetit”, tha Bardhi në studion e Syri.net.
Sipas tij, me raportet e policisë mund të burgoset cilido, pasi mund të gjesh punonjës policie që të firmosin raporte të tilla, që mund të çojnë në arrestimin e çdo qytetari.
“Në raport shkruhet se punonjësi i policisë ka parë qytetarin që ka marrë pjesë në protestë. Madje janë burgosur edhe dy qytetarë që kanë kartela mjekësore që provojnë se kanë probleme të shëndetit mendor, gjë që me ligj nuk mbajnë përgjegjësi për veprimet që kryejnë”, tha Bardhi.
Sipas tij, për fat të keq edhe një djalë që u arrestua kur po merrte kujdesin shëndetësor, mbeti në burg.
“Është një rast flagrant i shkeljes së të drejtave të njeriut, është një akt çnjerëzor dhe çdokush që ka urdhëruar një akt të tillë do të përgjigjet përpara ligjit”, tha Bardhi, duke shtuar se protestuesit janë në burg, ndërsa kriminelët janë jashtë burgjeve.
Bardhi tha se nuk do të ketë asnjë bisedim dhe asnjë negociatë me kryetarin e një bande, sikundër është Edi Rama sot. “Ne do të bëjmë negociata me cilindo politikan të përgjegjshëm, që nuk është pjesëtar i bandës”, tha Bardhi. Sipas tij, ne kemi bërë propozimet tona, ne kërkojmë zgjedhje të lira dhe të ndershme. “Sa kohë njeriu që ka shkaktuar këto situata është në qeveri, ne nuk ulemi në bisedime. Faktori ndërkombëtar është i mirëpritur të na afrojë sugjerime dhe këshillime në përputhje me standardet që kanë në vendet e tyre”, tha Bardhi.
