Petrit Vasili, nënkryetar i LSI-së, tha se protesta e djeshme ishte prova e një vullneti qytetar. Vasili tha se opozita nuk ra pre e skenarëve dhe kurtheve, duke shtuar se dje u konsumua një akt terrorist duke djegur një makinë të paidentifikuar, e cila u vendos pranë protestuesve.
Vasili kërkoi nga policia që të tregojë se kush ishte pronari i automjetit, duke shtuar se nga djegia dhe shpërthimi i automjetit mund të kishin humbur jetën dhjetra protestues të opozitës.
Ish-deputeti i LSI-së gjithashtu akuzoi qeverinë se fiku dritat në zonën ku zhvillohej protesta, ndërsa policia provokoi protestuesit për të krijuar skenarë që opozita nuk ran ë grackën e ngritur.
“Kjo ishte protesta më e madhe e organizuar ndonjëherë, ishte një protestë e cila u mbajt me vullnetin e qytetarëve kundër një qeverie të lidhur me krimin”, tha Vasili.
Sipas tij, protestuesit janë arrestuar pa asnjë provë.
Vasili paralajmëroi se dhunuesit e protestuesve do të përgjigjen një më një.
“Për të mbrojtur karriget e kriminalizuara po helmojnë qytetarët me gaz. Ky krim është i ndëshkueshëm dhe përgjegjësit do të përgjigjen para ligjit. Koha është shumë e afërt, t’i bëjnë llogaritë mirë”, tha Vasili.
