Policia e Shtetit duket se i është rikthyer praktikës së kërkimit të ndihmës nga qytetarët për zbardhjen e ngjarjeve kriminale.
Në komunikatën zyrtare të policisë, pas vrasjes së dyfishtë në Shkodër, ndër të tjera thuhet : “Policia e Shkodrës kërkon bashkëpunimin e qytetarëve që çdo informacion sado të vlefshëm që mund të kenë të njoftojnë në numrin 112 ose në numrin 0 69 410 2147 duke ju garantuar ruajtjen e plotë të anonimatit”.
Prej kohësh një frazë e tillë mungonte në komunikatat zyrtare të policisë, e cila duket e pafuqishme për zbardhjen e ngjarjeve kriminale veçanërisht në Shkodër.
Në 8 muaj, në kryeqendrën e veriut numërohen 11 viktima, shumica e krimeve të pazbardhura dhe pa autor. Duket se kjo situatë nuk ka bëë gjë tjetër veçse ka shtuar zinxhirin e ekzekutimeve, që mund të kenë ose jo lidhje mes tyre, por që në interpretimet mediatike trajtohen si krime mes bandave apo larje hesapesh.
Madje, as porositë e ministrit të Brendshëm, Sandër Lleshi, ndaj drejtuesve të policisë së Shkodrës për të zbardhur ngjarjet e bujshme në këtë qytet nuk kanë funksionuar.
Dhe duket se arma e vetme që i ka mbetur policisë dhe prokurorisë në këtë qytet është t’i kërkojnë ndihmë qytetarëve për të dhënë informacione.
