Kush nuk bën dallimin mes të sotmes dhe të djeshmes ka nevojë për shërbimin okulistik dhe nëse okulisti thotë se s’ka problem, atëherë ka nevojë për një spikolog, për të kuruar të keqen, që hapet pastaj portal më portal dhe kanal më kanal.
Kështu u shpreh Kryeministri Edi Rama, gjatë një tryeze ku janë diskutuar ndryshimet në Kodin Penal, lidhur me dhunën ndaj mjekëve.
Rama tha se korrupsioni në sistemin shëndetësor nuk mund të mohohet, por e cilësoi të papranueshme përdorimin e dhunës ndaj bluzave të bardha.
“Godit mjekë, policë, deputetë, për shkak të detyrës, atëherë problemi tejkalon atë që nuk dihet ku nis liria e njërit dhe ku përfundon e tjetrit.
Gjykatat janë pengje të korrupsionit dhe aktualisht janë në fazë transformimi. Është kjo arsyeja që ne po ndërhyjmë sërisht në Kodin Penal dhe goditja për shkak të detyrës do të hyjë në një kornizë të re, për të pamundësuar që prokurorët dhe gjyqtarët të japin vendime absurde për këtë vepër penale.
Kanosja do të rikonsiderohet si vepër penale, sikundër do të dënohen ata që futen në fushat e futbollit. Çdo goditje pë shkak të detyrës do të marrë përgjigje javën tjetër. Bëmë takime me FSHF, se atje fillon dhuna me ata që futen në fusha, se futbollisti ku do e ketë mendjen te loja apo te ai që hyn në fushë për ta goditur”, tha Rama.
Sipas tij, nuk mund të bëhet modë që sa herë thuhet mjek konsiderohet i korruptuar, apo kur thuhet infermier kihet parasysh hajduti.
“Kudo në Botë ka raste dështimesh në shpëtimin e jetëve, por kjo s’do të thotë se pushkatohen mjekët. Jo kur ndodh një tradhedi mund të themi mjeku e vrau, pasi mjekët nuk vrasin, por shpëtojnë jetë”, theksoi Rama.
Në vijim ai foli për atë që e cilësoi si industria e policisë private. “Sa policë privatë kemi ne, me rroga mizerabël dhe me kushte skandaloze. Kur shoh që mes mjekëve dhe infermierëve del edhe hija e policit privat më kujtohen filmat e kinostudios”, tha Rama.
Është thyer marrëdhënia mjek-pacient, që fatkeqësisht nuk kanë mundur ta rregullojnë as rritja e pagave dhe as përmirësimi i kushteve në sistemin shëndetësor.
Kështu u shpreh ministrja e Shëndetësisë, Ogerta Manastirliu, gjatë një tryeze me mjekë, në kuadër të diskutimit të ashpërsimit të masave për dënimin e dhunuesve të bluzave të bardha.
Mansatirliu tha se kanosja dhe kërcënimi i bluzave të bardha për shkak të detyrës do të konsiderohen si vepra penale dhe do të dënohen me burg.
Por ajo shtoi se do të forcohet edhe marrja e urdhërave të profesionistëve, si një garanci që duhet t’i japim pacientëve për shërbimin shëndetësor që ata marrin.
“Na ka ardhur një propozim që spitalet të ruhen me policë, por a është kjo zgjidhja? A mund të kurojmë ne marrëdhënien mjekë-pacientë duke i ruajtur me policë? Jo, kjo marrëdhënie do të kurohet duke zbatuar maksimalisht regjimin e ri në qendrat spitalore.
Ju po shihni ndryshimet që kanë nisur prej 5 vitesh, megjithëse ka shumë punë për të bërë.
Jemi në krah të mjekëve kundër dhunë, jemi në krah të qytetarëve për të përmirësuar sistemin shëndetësor”, tha Manastirliu.
