Populli ka folur dhe do të flaës edhe më 16 mars, ndaj Edi Rama duhet të dëgjojë zërin e popullit. Është ky mesazhi që kreu demokrat Lulzim Basha ka përcjellë përmes mediave, pas takimit të zhvilluar në seli me të Ngarkuarën me Punë të SHBA në Tiranë, Leyla Moses-Ones.
Basha nuk ka pranuar të bëjë komente mbi takimin, por theksoi se aksioni i opozitës dhe qytetarëve do të vijojë dhe nuk do të ketë hapa pas.
Ai i bëri thirrje Edi Ramës që të lejojë hetimin e dosjeve 339 dhe 184, por shtoi se Kryeministri ka frikë nga një gjë e tillë pasi është vetë i përfshirë.
Të dyja dosjet, sipas opozitës, kanë të bëjnë me përfshirjen e elementëve dhe grupeve kriminale, në bashkëpunim me zyrtarë të lartë të qeverisë, në blerjen e votave në zgjidhjet e fundit.
Basha tha se opozita i ka një borxh Shqipërisë për ta bërë si Europa, me një parlament të çliruar nga krimi.
Në vijim, kreu demokrat tha se proçesi i zgjedhjes së kandidatëve për deputet të PD-së do të bëhet sipas parimeve më demokratike ndërkombëtare, përmes proçesit “një anëtar, një votë”.
“Dy ditë jashtëzakonisht të sukseseshme diskutimi me përfaqësues të Institutit amerikan Republikan, që janë këtu për të ndihmuar PD.
Kam vendosur të sjell standardet demokratike dhe kam mbështetjen e IRA, konservatorëve britanikë dhe Konrad Adenauer.
Kandidatët do të zgjidhen përmes parimit një anëtar një votë. Ky është modeli që unë ofroj, dhe me ndihmën e partnerëve tanë shumë shpejt do të nisim primaret për të evidentuar kandidatët më të mirë”, tha Basha.
