Kryetari i PD-së, Lulzim Basha, u shpreh mbrëmjen e sotme se opozita dhe qytetarët jo vetëm nuk do të njohin Parlamentin e krimit, por as policinë e shtetit.
Me një fjalim nga selia e PD-së, Basha tha se mosbindja civile do të shtrihet nga veriu në jug.
Basha theksoi se askush nuk duhet të mendojë se mund të fshihet pas imunitetit apo rrobës së policisë kur helmon protestuesit.
“Policia e krimit helmoi sot fëmijë, gra e nëna, duke hedhur gaz lotsjellës. Po i drejtoj një thirrje që do të përgjigjen deri në një për aktet e tyre të turpshme, për sulmet me lëndë helmuese. Ata do të marrin përgjigjen që meritojnë si tradhetarë të shqiptarëve”, tha Basha.
Deklarata e plotë
Qytetarët që u mblodhën brenda pak orëve i treguan Maduros së Ballkanit se ky vend ka zot dhe zoti janë qytetarët dhe populli sovran i Republikës së Shqipërisë.
· Me urdhrin për të sulmuar fëmijët dhe gratë në protestë me lëndë kimike, Edi Rama i shpalli luftë qytetarëve të vet. I them Edi Ramës se koston do ta kesh 100% ti.
· Edi Rama përdori dhunën e verbër ndaj qytetarëve, të cilët protestonin në paqe për të marrë sendin e vjedhun nga bandat kriminale të Edi Ramës, Kuvendin e Shqipërisë.
· Ne nuk frikësohemi, sepse ne luftojmë për një kauzë të drejtë. Ne luftojmë për zgjedhje të lira e të ndershme. Përballë kemi republikën e krimit, prej krimit e për krimin, të cilën do ta shembim nga themelet.
· Beteja që ka nisur është pa kthim. Historia na tregon se kjo betejë do të përfundojë me shporrjen e qeverisë së krimit dhe triumfin e vlerave europiane. Kanë hequr korrentin, por populli do t’u heqë prizën!
· Sot ne nuk kemi më Kuvend, nuk kemi më qeveri dhe, për fat të keq, nuk kemi më as polici. Kemi vetëm një bandë hajdutësh dhe kriminelësh, që keqpërdorën sot institucionin që ka për detyrë të mbrojë ligjin.
· Ne nuk e njohim më, jo vetëm Kuvendin dhe qeverinë e krimit, por as policinë e krimit dhe mosbindja civile do të shtrihet nga jugu në very. Ne do ta çlirojmë Shqipërinë nga kjo bandë dhe veglat e saj.
· Çdokush, me uniformë dhe pa uniformë, me syze analisti apo kostum oligarku që është në krah të bandës së hajdutëve dhe Edi Ramës, është tradhëtar i interesave të shqiptarëve dhe do të trajtohet si tradhëtar kudo që ndodhet.
