Çlirim Gjata, sekretari për Çështjet Ligjore në PD, tha se opozita ka dorëzuar mandatet nga momenti që ka çuar njoftimet në protokollin e Kuvendit.
I pranishëm në studion e “Opinion”, Gjata tha se askush nuk po e kupton nga mazhoranca, përfshi edhe Ramën, që njerëzit janë të nxehur, kanë humbur qetësinë edhe ata që janë njerëz shumë të qetë.
“PD është partia më pro-europiane dhe pro-amerikane që nga momenti i krijimit të saj. Dhe të gjithë historinë që ka, nuk mund të vazhdonte më me një situatë të tillë. Aksioni politik do të vazhdojë në çdo qytet, do të ketë protesta, do të rikthehet shpresa”, tha Gjata.
Sipas tij, Rama është një diktatoruc frikacak, që u largohet nga zyra sapo afrohen protestuesit.
“E majta nuk ka pasur asnjëherë lidera që kanë pasur të përgjegjshëm për detyrën, ikin si frikacakë. Kështu ndodhi edhe kur hymë në grevën e urisë në 1990, Rama iku në Greqi”, tha Gjata.
Sipas tij, opozita sot kërkon qeveri tranzitore që të bllokojë krimin dhe detashmentet e krimit që kanë qindra miliona euro në dorë për të blerë zgjedhjet.
“Kjo qeveri tranzitore duhet t’i hapë rrugën drejtësisë, për të çuar para saj ato që kanë blerë zgjedhjet, sikundër është dosja 339”, tha Gjata.
Sipas tij, ajo që kërkojmë ne nga ndërkombëtarët është asgjë më shumë sesa kërkojnë qytetarët e vendeve të tyre.
