Kreu demokrat, Lulzim Basha, gjatë një takimi me banorë të Vorës, theksoi se Shqipëria është në një krizë të thellë, sepse është në një krizë të thellë ekonomike.
Basha tha se shqiptarët nuk kanë lekë dhe gjysma e familjeve shqiptare jetojnë me më pak se 5 mijë lekë të vjetra në ditë, ndërsa Edi Rama bredh nga Berlini deri në Arabinë Saudite, ndërsa shqiptarëve u nxjerr gjuhën.
“Zëri i Amerikës i zbuloi skandalin që zbuloi që Rama nuk është Kryeministri i shqiptarëve, por është kryeministri i llumit, ndaj i shërben hajdutërisë dhe llumit.
Vendi nuk ka qeveri, por ka një bandë. Madje i ka bërë hesapet që edhe në zgjedhjet e ardhshme të marrë zgjedhjet me krimin dhe bandat.
PD ka një plan për të nxjerrë Shqipërinë dhe qytetarët nga kriza, që nis me uljen e çmimit të naftë me 300 lekë, uljen e çmimit të energjisë me 30-40 % për bizneset prodhuese, 20 % për bizneset e vogla dhe gjithashtu do të kemi një ulje të ndjeshme për konsumatorin familjar.
Prioriteti ynë është punësimi i shqiptarëve, krijimi i vendeve të reja të punës.
Çdo qindarkë që Edi Rama dhe oligarkët kanë vjedhur, do t’u kthehen shqiptarëve. Kam ardhur këtu me një plan dhe për t’ju thënë se kemi vullnetin politik për t’a zbatuar atë me ekipin më të mirë.
Proçesi elektoral është i bllokuar, kjo nuk është çështje Kodi, por zbatimi të ligjit. Nëse do të zbatohej Kodi Zgjedhor dhe ai Penal, sikundër është sot, atëherë do të ishin në burg Vangjush Dako, Saimir Tahiri, Damian Gjiknuri, madje edhe vetë Edi Rama”, tha Basha.
Në vijim ai ftoi qytetarët që në 16 shkurt të mblidhen në Tiranë, të bëjnë bashkimin më të madh, për ti dhënë fund regjimit të Edi Ramës.
“Nuk do të jetë ditë fjalimesh, por zëri i vetëm që do të dëgjohet do të jetë zëri juaj, zëri i qytetarëve të nëpërkëmbur. 16 shkurti do të jetë dita e parë e ndryshimit, dita nuk qytetarët do të marrin në dorë fatin e tyre, nuk do të ketë asnjë marrëveshje me Edi Ramën, i cili është kryeministri i krimit dhe i shërben krimit”, tha Basha.
