Pas më shumë se 3 orësh, ka përfunduar protesta e katërt radhazi e qytetarëve në Tiranë kundër projekteve të ndërtimit në Zvërnec dhe Nartë të Vlorës, ku mijëra protestues u mblodhën pasditen e së mërkurës para Kryeministrisë.
Qytetarët marshuan nga Sheshi “Skënderbej” drejt bulevardit “Dëshmorët e Kombit”, duke kërkuar anulimin e menjëhershëm të projektit të resortit luksoz në zonën e Zvërnecit. Protestuesit e cilësuan projektin si kërcënim për mjedisin dhe interesin publik, ndërsa shprehën pakënaqësi edhe ndaj klasës politike në tërësi.
Gjatë tubimit u dëgjuan thirrje si “Rama në burg, Berisha në burg” dhe “opozitë e shitur”, duke reflektuar revoltë ndaj të dy kampeve politike. Protestuesit akuzuan politikën për mungesë transparence dhe bashkëpunim në dëm të qytetarëve, duke paralajmëruar vijimin e mobilizimit deri në tërheqjen e projektit dhe dorëheqjen e kryeministrit Edi Rama.
Situata u tensionua kur turma u përball me një gardh metalik të vendosur nga Policia e Shtetit pranë Urës së Lanës. Protestuesit e rrëzuan barrierën dhe vijuan marshimin drejt Kryeministrisë, ndërsa policia ndërhyri për t’i shpërndarë me autobotë uji dhe spraj piperi, çka përshkallëzoi përplasjet.
Sipas autoriteteve, masat e sigurisë ishin vendosur edhe në kuadër të ndeshjes Shqipëri–Izrael që pritet të zhvillohet në “Air Albania”.
Kjo shënon protestën e katërt në Tiranë për çështjen e Zvërnecit, ndërsa pjesëmarrja e sotme ishte ndër më të lartat deri tani, me mijëra qytetarë në bulevard.
