Jorida Tabaku, deputete e PD-së, ka vënë theksin sot te situate e rënduar ekonomike që po kalon vendi. Tabaku prej disa ditësh po zhvillon me qytetarë dhe përfaqësues të bizneseve të vogla, ku ka evidentuar edhe problemet e shumta ekonomike dhe mungesën e fuqisë blerëse.
“Gjatë vizitës së sotme në një numër të madh dhe të shumëllojshëm biznesesh vërejta se shumica e tyre ndonëse ora po afronte 12 nuk kishin nisur ende të bënin shitjet e para. Qytetarët nuk kanë parà të blejnë produkte, nuk konsumojnë pasi të gjitha të ardhurat u shkojnë në taksa, çmimin e nergjisë, tarifën e ujit, kostot e transportit. Edhe marketet ishin në krizë të thellë sa i takon konsumatorëve, dëshpërimi i tyre qe i madh.
A ka zgjidhje kjo situatë? Po! Një ekonomi e drejtuar për nga konsumi dhe qytetari e jo nga oligarkia është zgjidhja.
Përkrah uljes së taksave, uljes së TVSh-së dhe incentivave të bizneseve do të shoqërohet me rritjen e pagave, uljen e çmimeve të energjisë elektrike, karburantit dhe sa e sa të mirave të tjerave që rëndojnë artificialisht kostot e produkteve. Qytetarët do t’u rikthehen shpenzimeve dhe nuk do t’u mbarojë rroga në ditët e para të muajit”, tha Tabaku.
Në vijim, deputetja demokrate ka ftuar qytetarët në protestë më 16 shkurt për të protestuar për xhepin e tyre.
