Kryedemokrati, Sali Berisha, ka akuzuar Edi Ramën për përdorimin e grupeve kriminale dhe karteleve për të manipuluar procesin zgjedhor dhe për të blerë vota.
Gjatë një fjalimi nga foltorja para kryeministrisë, Berisha ka përmendur disa probleme të rëndësishme që prekin qytetarët, duke përmendur si shembuj situatën e përmbytjeve në Durrës dhe mënyrën se si janë trajtuar familjet e prekura.
“A morën dëmshpërblim 6 mijë familjet e Durrësit që u përmbytën? Asgjë! Ata nuk marrin shpërblim, kurse Gjushi me pantallona, apo Sakoja, rrit rrogën e vetë, mbledh Këshillin e rrit rrogën pa shkuar në punë, për të vjedhur duke fjetur,” deklaroi Berisha, duke shtuar se qeveria e Edi Ramës po e përdor pushtetin për të pasuruar vetë zyrtarët, ndërsa qytetarët nuk marrin asnjë ndihmë nga shteti.
Ai gjithashtu ka theksuar se ky është një veprim i jashtëzakonshëm i manipulimit, i cili po zhvillohet duke përdorur të gjitha mjetet dhe burimet e mundshme, ndërsa ka theksuar se më datë 17 prill sipas tij, Rama do të marrë leksion nga opozita.
“Kjo foltore u nis si e qytetarëve dhe me fjalimet e mbajtura këtu është pa diskutim një kreshmë në oratorinë, zërin, përgjegjësinë e qytetarëve shqiptarë. Ndaj dhe data 17 do jetë leksioni i madh që do i jepet këtij regjimi. Do vazhdojmë betejën tonë gjer në fitoren e sigurt”,- tha Berisha, duke theksuar se qytetarët kanë nevojë për të dëgjuar të vërtetën dhe për të kuptuar manipulimet që ndodhin pas dyerve të mbyllura të institucioneve shtetërore.
