Kryedemokrati, Sali Berisha, hodhi akuza të forta ndaj mazhorancës socialiste dhe qeverisë, se ka blerë zgjedhjet e fundit lokale dhe të përgjithshme, duke paguar nga 50 dhe 100 euro për votë pensionistët dhe shtresa të tjera sociale.
Ndërsa zhvilloi sot (27 mars) një takim me Departamentin e Çështjeve Sociale në Partinë Demokratike, ai foli për situatën kritike me krizën ekonomike, të çmimeve të ushqimeve, si dhe abuzimet financiare të pushtetit.
Për të, çështja e minimumit jetik është emergjencë, pasi shqiptarët janë në varfëri ekstreme, teksa premtoi rritje rrogash dhe pensionesh në nivelet evropiane nëse PD vinte në pushtet.
Berisha tha se më shumë se 40% e shqiptarëve përballen me vështirësi ekonomike që prekin kafshatën dhe shëndetin e tyre.
“Së bashku debatojmë për një problem i cili intereson jetën e më shumë se 40 për qind të shqiptarëve, prek kafshatën dhe shëndetin e gjysmës së popullatës në vend. Shqipëria është në një situatë dramatike në raport me shpërndarjen e të ardhurave, në raportin e rrogave me çmimet dhe është vendi i vetëm që nuk ka të përcaktuar një minimum jetik. Zhvillimet e 12-13 viteve të fundit, i shndërruan shqiptarët nga qytetarët me rroga e pensionet më të larta në rajon, në qytetarët me rrogat e pensionet më të ulëta. E vërteta është që nuk u ndoq as indeksimi i çmimeve”, tha kryedemokrati mes të tjerash.
Por ai nuk la pa denoncuar edhe blerjen e votës nga kryeministri Edi Rama në zgjedhjet e fundit lokale dhe të përgjithshme, që e cilësoi “formula e mashtrimit elektoral”.
“Për pensionistët është gjetur një formulë mashtrimi elektoral, 50 euro vota e tyre në zgjedhjet lokale, 100 euro në zgjedhjet e përgjithshme, ndërkohë kontot bankare të qeveritarëve shkojnë në qindra milionë e miliardë. Më të keqtrajtuar se pensionistët shqiptar nuk ka dhe ata nuk e meritojnë. Jo vetëm që nuk u rritën pensionet, por edhe ata që mbaheshin me reminitancat, 35 për qind të parave ua mori droga sepse u zhvlerësuar euro”, shtoi ai.
Dhe në fund dha alarmin se Shqipëria po përjeton një dramë, ku dhe euro është zhvlerësuar nga paratë e krimit dhe karteleve të drogës.
“Jemi i vetmi vend ku euro është zhvlerësuar në mënyrë dramatike. Baronët e drogës me eurot që fusin reminitancat i përgjysmuan si vlerë”, tha ai.
