Policia e Tiranës ka sekuestruar katër automjete luksoze me vlerë rreth 200 mijë euro, të cilat dyshohet se janë të vjedhura, ndërsa janë janë proceduar penalisht dy shtetas dhe janë shpallur në kërkim dy të tjerë.
Sipas policisë, është nisur procedimi penal për shtetasin S. C., i cili dyshohet se ka trafikuar një automjet tip “Jeep”, të vjedhur në Itali, si dhe për shtetasin E. Ç., i cili dyshohet se ka trafikuar një “Range Rover”, të vjedhur në Shtetet e Bashkuara të Amerikës.
Ndërkohë, në kërkim janë shpallur shtetasit E. J. dhe R. R., të dyshuar për trafikimin e një automjeti “BMW”, të vjedhur në Gjermani, dhe një “Seat Cupra”, të vjedhur në Itali.
Të katër automjetet janë sekuestruar në cilësinë e provës materiale, ndërsa operacioni vijon për identifikimin e personave të tjerë të përfshirë në këtë aktivitet kriminal.
Materialet procedurale i janë referuar Prokurorisë për veprime të mëtejshme.
