Edi Rama në mbledhjen e sotme të grupit parlamentar socialist, pasi mbrojti Ballukun dhe lajmëroi se PS nuk pranon kërkesën për heqjen e imunitetit, u shpreh se deputetët duhet të heshtin.
Këtë e shoqëroi edhe me një gjest të gishtave duke kyçur gojën, që nënkuptonte se socialistët duhet të mbyllin gojën.
Deputetja e PD-së Albana Vokshi ka reaguar në rrjetet sociale duke thënë se Rama mbylli gojët e të tijve, por zërin e qytetarëve nuk mund ta mbyllë dot.
Sipas saj, ata do reagojnë dhe protestojnë fuqishëm, për t’i dhënë fund realitetit që Rama po përpiqet të fshehë.
“Një simbolikë e qartë: gojët mbyllen.
Mbyllet fjala në grup, mbyllet debati, mbyllet e vërteta për median dhe për realitetin që jetojnë shqiptarët çdo ditë.
Por ka një gjë që nuk mund ta mbyllë askush: zërin e qytetarëve.
Sepse në fund, vetëm qytetarët kanë fuqinë të reagojnë dhe vetëm ata mund t’i japin fund një realiteti që përpiqen ta fshehin.”,- shkruan Vokshi në fb.
