Zyrtarë të lartë të Bashkimit Evropian dhe të bllokut të Amerikës së Jugut, Mercosur, kanë nënshkruar të shtunën në Paraguai një marrëveshje të tregtisë së lirë, duke hapur rrugën për marrëveshjen më të madhe tregtare të arritur ndonjëherë nga BE-ja pas 25 vitesh negociatash.
Marrëveshja synon uljen e tarifave dhe forcimin e shkëmbimeve tregtare mes dy rajoneve. Ajo duhet tashmë të miratohet nga Parlamenti Evropian dhe të ratifikohet nga parlamentet e vendeve anëtare të Mercosur-it, përfshirë Argjentinën, Brazilin, Paraguain dhe Uruguain.
Në ceremoninë e nënshkrimit morën pjesë presidentja e Komisionit Evropian, Ursula von der Leyen, dhe presidenti i Këshillit Evropian, Antonio Costa, si dhe presidentët e vendeve të Mercosur-it. Presidenti i Brazilit, Luiz Inacio Lula da Silva, mungoi në ceremoni dhe u përfaqësua nga ministri i Jashtëm.
Marrëveshja mori miratimin paraprak të shumicës së vendeve të BE-së javën e kaluar, pavarësisht kundërshtimeve të fermerëve dhe organizatave mjedisore, të cilët shprehin shqetësime për rritjen e importeve të lira nga Amerika e Jugut dhe për pasojat e mundshme në shpyllëzimin e rajonit.
