Një i ri është arrestuar nga policia në Tropojë pasi u kap mat në tentativë për të shitur një sasi lënde narkotike që arrinte 5 kilogramë. Në pranga u vu po ashtu edhe blerësi.
Ata u arrestuan në momentin kur 22-vjeçari I. M. po i shiste lëndën narkotike, 22-vjeçarit S. A.
“Si rezultat i administrimit të shpejtë të informacioneve të siguruara për shitblerjen e një sasie lënde narkotike, Komisariati i Policisë Tropojë, në bashkëpunim me strukturat e DVP Kukës, organizoi dhe finalizoi në drejtimin e Prokurorisë, operacionin policor të koduar “Start 2026”.
Në kuadër të këtij operacioni u arrestuan shtetasit:
– I. M., 22 vjeç, banues në fshatin Astë dhe S. A., 22 vjeç, banues në Tiranë.
Këta shtetas u kapën në flagrancë nga shërbimet e Policisë, në fshatin Astë, në momentin kur shtetasi I. M. po i shiste lëndën narkotike, shtetasit S. A.
Qesja me lëndë narkotike kanabis, me peshë 5 kilogramë, që u gjet gjatë kontrollit në automjetin e shtetasit I. M., u sekuestrua në cilësinë e provës materiale, bashkë me automjetin dhe një shumë parash.”- njofton policia.
Materialet procedurale iu referuan Prokurorisë, për veprime të mëtejshme.
