Reshjet e dendura të shiut gjatë natës, kanë shkaktuar dëme të konsiderueshme në një banesë në fshatin Vajzë të bashkisë Selenicë, e cila si pasojë është shembur.
Banorët kanë treguar për mediat momentet e frikshme të shembjes së shtëpisë. Një e moshuar 70-vjeçare rrëfen se rreth orës 02:00 të mëngjesit, muri i banesës u shemb papritur për shkak të masës së madhe të dherave që rrëshqitën nga shpati.
“Në orën 01:30 dëgjova krisma, dola jashtë, por nuk pashë gjë. Në orën 02:00, ndjen djali dhe më thotë ‘ra muri o ma’. Dolëm menjëherë dhe nuk dinim çfarë të bënin, çfarë të merrnim nga shtëpia. Shtëpia imë u dëmtua totalisht. Nuk e dimë ku të qëndrojmë sonte. S’kemi njerëz të afërt këtu. Jetoj me burrin dhe me djalin. Djalin e kam të sëmurë dhe nuk flet dot”, shprehet e moshuara me lot në sy.
Ajo thotë se aktualisht nuk ka asnjë mundësi strehimi dhe apelon për ndihmë.
