Nga Boldnews.al
Kërkesa e Prokurorisë së Posaçme, drejtuar Parlamentit, për lëshimin e autorizimit për arrestimin e zv.kryeministres Belinda Balluku, siç edhe pritej, ka ndarë opinionin publik në dysh.
Nga njëra anë, juristët dhe analistët pranë qeverisë, argumentojnë se shumica socialiste nuk duhet të lëshojë autorizimin, sepse, në vlerësimin e tyre, kërkesë e SPAK-ut është një lëvizje inatçore, pasi Gjykata Kushtetuese pezulloi vendimin e Gjykatës së Posaçme për “pezullimin nga detyra” të Ballukut dhe se deputetët duhet të vlerësojnë provat që kanë siguruar deri më tani prokurorët e posaçëm.
Nga ana tjetër, juristë dhe analistë kritikë me qeverinë, mbështesin idenë se Parlamenti ka një rol shumë të limituar në këtë proces, nuk ka tagër për të shqyrtuar vlefshmërinë e provave konkrete dhe se duhet të japin Autorizimin, me qëllim që t’i krijohet mundësia Prokurorisë të zhvillojë hetimin e thelluar penal.
Përballë këtyre opinioneve të ndara, Parlamenti tashmë ka vendosur disa precedentë, sidomos në rastin e ish-zv.kryeministrit Arben Ahmetaj dhe kryetarit të opozitës, Sali Berisha, për të cilat ka vendosur disa piketa të sjelljes në rastet e kërkesave për Autorizimi për arrestin (me burg ose në shtëpi) të deputetëve.
Çfarë vlerëson Parlamenti
“Boldnews.al” raporton se, në rastet e mëparshme, kur është miratuar kërkesën për Autorizim për Ahmetajn dhe Berishën, shumica socialiste është bazuar në një Opinion të Komisionit të Venecias të vitit 2014
Në Opinionin, e numërtuar CDL-AD (2014)01, ekspertët e Venecias shprehen: “Komisioni vlerëson për më tepër që organi parlamentar që shqyrton kërkesën për heqjen e imunitetit nuk duhet të bëjë një vlerësim ligjor të çështjes si e tillë. Në veçanti, ky organ nuk duhet në asnjë rrethanë të japë qëndrimin e tij për fajësinë ose jo të deputetit përkatës apo të bazueshmërinë së procedimit penal”.
Bazuar në këto standarde, shumica socialiste ka argumentuar në rastin e Ahmetaj dhe Berishës se, për çështjet e Autorizimit, Parlamenti:
– ka kompetencë të vlerësojë nëse plotësohen kushtet ligjore për të dhënë autorizimin për marrjen e një mase të sigurimit personal siç është arresti në burg apo në shtëpi, heqje lirie në çfarëdolloj forme, kontroll personal dhe të banesës së deputetit;
– Nëse plotësohen apo jo kushtet, Kuvendi duhet të bazohet në gjykimin e vet, duke iu referuar relacionit të organit të akuzës dhe provave që mbështesin këtë relacion;
– Kuvendi, nuk bën vlerësimin e provave, por vlerësimin e kushteve dhe rrethanave për të krijuar bindjen se ekzistojnë dyshime të arsyeshme dhe të bazuara se deputeti ka kryer një vepër penale;
Nëse kërkesa është bërë nën ndikime politike apo të natyrave të tjera të paligjshme.
Si janë këto standarde në rastin “Balluku”
Në 16 dhjetor 2025, kreu në detyrë i Prokurorisë së Posaçme, Altin Dumani, i përcolli kryetarit të Kuvendit, Niko Peleshi, kërkesën për “Dhënien e autorizimit për arrestimin / heqjen e lirisë së deputetit/ zv.kryeministrit / ministrit, nëpërmjet zëvendësimit të masës së sigurimit.
Në shkresë, Prokuroria e Posaçme thotë se kërkon autorizimin për zëvendësimin e masës “pezullim nga detyra” në masën e arrestit për Belinda Ballukun, në kuadër të procedimit penal nr. 136, viti 2025.
Gjithashtu, në shkresë thuhet se bashkëlidhur kërkesës është edhe relacioni përkatës, i shoqëruar me provat.
Pra, vetëm referuar të dhënave në këtë shkresë, kuptohet se:
– Kuvendi ka kompetencë për të shqyrtuar kërkesën për Autorizim, pasi subjekti për të cilin është bërë kërkesa, Belinda Balluku, gëzon mandatin e deputetit.
– Kërkesa e Prokurorisë së Posaçme është e shoqëruar me relacionin dhe provat përkatëse (të cilat për momentin janë kyçur në kasafortën e Parlamentit nga kryetari Niko Peleshi).
– Kuvendi nuk mund të bëjë vlerësimin e provave, pasi kjo është kompetencë e gjykatës. Kuvendi vlerëson vetëm nëse është ndjekur procedura, pra, nëse është regjistruar procedimi penal, nëse Prokuroria ka kryer veprime hetimore dhe nëse kërkesa është e argumentuar nga ana e teknikës legjislative.
– Kuvendi duhet të vlerësojë nëse hetimi penal ndaj Belinda Ballukut është bërë nën ndikime politike apo ndikime të tjera, gjë që duket e pamundur, pasi askush, deri më tani, nuk ka ngritur pretendime të tilla.
Referuar standardeve të pranuara dhe të aplikuara nga vetë maxhoranca socialiste në rastet e mëparshme (Arben Ahmetaj, Sali Berisha), logjikisht, vendimi i Parlamentit për kërkesën e Prokurorisë së Posaçme duhet të jetë “dhënia e Autorizimit për arrestimin/heqjen e lirisë për deputeten, ministren, zv.kryeministren Belinda Balluku”.
Megjithatë, seanca në Këshillimin e Mandateve dhe Imuniteteve në Parlament, parashikuar për këtë të premte (19 dhjetor 2025), pritet të japë një dekriptim të maxhorancës mbi një mesazh që lëshoi kryeministri Edi Rama, menjëherë pas kërkesës së Prokurorisë së Posaçme për arrestimin e Belinda Ballukut.
“…Këtë herë na kërkohet të japim opinionin tonë, ne do të angazhohemi me të gjithë përgjegjësinë tonë përpara shqiptarëve që na dhanë 83 mandate, e do të përgatitemi për të mbajtur një qëndrim të drejtë, të qartë e të denjë, si forca udhëheqëse e vendit dhe e Reformës në Drejtësi”, shkroi Rama në platformën X në 17 dhjetor të këtij viti.
