Një tjetër tragjedi familjare me protagoniste një grua shqiptare ka tronditur Italinë. Sadjide Muslija, 49 vjeçe, është gjetur e vrarë në banesën e saj në Ankona, mbrëmjen e 3 dhjetorit. Autor i dyshuar është bashkëshorti i saj, Nazif Muslija, 50 vjeç, i cili është në arrati dhe po kërkohet intensivisht nga karabinierët.
Sipas mediave italiane, viktima u gjet në shtratin e saj me shenja të rënda dhune në fytyrë dhe trup, pasi nuk ishte paraqitur në punë dhe pronari kishte njoftuar policinë. Hetuesit zbuluan se autori ishte larguar me një makinë tip Smart, ndërsa telefoni i tij rezulton i fikur që nga momenti i ngjarjes.
Hetimet kanë nxjerrë në dritë një histori të përsëritur dhune. Nazif Muslija kishte qenë më parë i arrestuar për dhunë ndaj bashkëshortes dhe kërcënime me sëpatë. Në korrik, ai ishte dënuar me 1 vit e 10 muaj burg, por me kusht që të ndiqte një program rehabilitimi për burra të dhunshëm, i cili – sipas avokatit – nuk kishte nisur ende për shkak të mungesës së vendeve.
Çifti kishte një djalë 27-vjeçar që jeton në Zvicër. Ai mësoi lajmin e tmerrshëm për vrasjen e nënës nga avokati i babait. Me një dhimbje që flet vetë, i riu tha shkurt: “E prisja.”
Ekspertët e Njësisë së Hetimeve Shkencore të Ankonës janë rikthyer në banesën ku ndodhi krimi për të gjetur gjurmë dhe mjetin e fortë me të cilin dyshohet se u godit gruaja. Disa objekte janë sekuestruar, ndërsa autoritetet italiane ende nuk kanë caktuar datën e autopsisë.
Ndërkohë, kërkimet për Nazif Muslijën vijojnë pa ndërprerje në të gjithë territorin italian, ndërsa policia ka lëshuar urdhër kombëtar ndalimi për kapjen e tij.
