Detaje të reja kanë dalë në dritë nga ngjarja e regjistruar pak ditë më parë në Greqi, ku një shqiptar u gjet i lidhur dhe i djegur brenda një makine.
Mediat greke shkruajnë se në trupin e tij është gjetur edhe një predhë plumbi, e cila ka bërë që të ndryshojë pista e hetimeve dhe dinamika e ngjarjes.
Ngjarja ndodhi në Skourta, në Viotia, ndërsa Policia ka marrë një mostër ADN-je nga i afërmi i punëtorit të ndërtimit nga Shqipëria, i cili besohet të jetë viktima, për të përcaktuar nëse është ai.
Ai u gjet të premten e kaluar i djegur në një automjet të vjedhur dhe i prangosur. Makina është djegur ndoshta dy deri në tre ditë më parë se të gjendej. Mjeti u vu re nga një gjuetar, i cili njoftoi autoritetet.
Sipas mediave vendase mjeti ishte vjedhur nga Glifadha e Athinës në maj dhe kishte targa të falsifikuara të një makine nga Katerini.
Hetimet janë marrë nën përgjegjësinë e Departamentit të Hetimit të Krimit të Organizuar, i njohur si “FBI greke”. Autoritetet po punojnë për të zbardhur shkaqet e vrasjes dhe lidhjet e mundshme me grupe kriminale të organizuara.
