Ish-kryeministri Sali Berisha ka lëshuar akuza të forta ndaj kreut të SPAK, Altin Dumani, pas paraqitjes së tij në Prokurorinë e Posaçme në kuadër të masës “detyrim paraqitje” për çështjen “Partizani”.
Berisha e cilësoi Dumanin si “mercenar” dhe e akuzoi se po fsheh dokumente që inkriminojnë kandidaturat për drejtimin e SPAK.
“Ky mercenar po fsheh dokumenta krimi të kandidaturave që kërkon të nxjerrë. Kam informacione se po fsheh dokumente të personave që kërkon të kandidojë për kryetar, sepse ka probleme të veta,” u shpreh Berisha, duke paralajmëruar se do të publikojë dokumentet në momentin e duhur.
Ai akuzoi Dumanin se po manipulon procesin e përzgjedhjes së drejtuesit të SPAK dhe se po mban të fshehura dosje të rëndësishme, përfshirë atë të njohur si “Aruba”, për të cilën tha se është zbuluar nga një gazetar italian, ndonëse ndodhet prej vitesh në Shqipëri.
Berisha kritikoi gjithashtu mungesën e drejtuesve të emëruar në prokuroritë e vendit, duke e cilësuar si “falimentim total të sistemit” dhe akuzoi se emërimet po bëhen në mënyrë të korruptuar.
“Kanë 5 vite që kanë emëruar vetëm 3 kryeprokurorë rrethesh. Ose i rrjepin me 500 mijë euro atë që do emërojnë, ose janë në faliment,” tha ai.
Në fund, Berisha e cilësoi sistemin aktual si “korporativ dhe antishtet”, duke e lidhur me ndikimin e George Soros dhe duke i bërë thirrje mediave dhe opinionit publik të mos heshtin përballë këtyre zhvillimeve.
