Tirana ka fituar me rezultatin e pastër 3-0 derbin e kryeqytetit kundër Partizanit, i konsideruar ndryshe si “derbi i hallexhinjëve” për shkak se dy ekipet ndodhen në krizë rezultatesh dhe në vendet e fundit në tabelën e renditjes.
Në ndeshjen e vlefshme për javën e 6-të të Kategorisë Superiore, bardheblutë gjetën avantazhin që në minutën e ’19 të takimit me anë të Falaye, i cili e dërgoi topin në rrjetë, me një goditje me kokë, pas një topi të gjatë nga Soler.
Vetëm pak minuta më vonë, në të 30-tën, Tsotne Patsatsia fitoi një penallti pas ndërhyrjes së Albion Markut. Sulmuesi gjeorgjian u tregua i saktë nga pika e bardhë dhe dyfishoi shifrat.
Në pjesën e dytë, Tabekou vulosi fitoren me golin e tretë të realizuar në minutën e ’74 të takimit, i cili nuk gaboi përballë Qirkos, pas një topi të nxjerrë nga Ismajli.
Pas këtij goli, reagimi i “demave” u bë i pamundur, teksa Tirana e menaxhoi qetë ndeshjen deri në fund, duke marrë tri pikë të rëndësishme dhe fitoren e parë sezonale.
Pas kësaj fitore, skuadra e Roberto Bordin ngjitet në vendin e tetë me pesë pikë, duke parakaluar në renditje Partizanin, i cili zbret në vendin e parafundit me katër pikë. Për “demat”, kjo ishte humbja e katërt radhazi.
