Gazetari Klodian Tomorri ka kritikuar situatën e krijuar nga mazhoranca dhe Edi Rama sot në parlament, ku brenda pak minutash votuan qeverinë dhe programin qeverisës, duke i hequr opozitës mundësinë të diskutojë.
Tomorri u shpreh në Syri Tv, se një përqendrim kaq të madh pushteti në duart e Edi Ramës e ka kthyer parlamentin në një cirk ku shkohet vetëm për të kaluar aktet e qeverisë pa debat.
‘Ky parlament sigurisht që nuk mund të jetë normal dhe nuk e di kush ka pritshmëri për normalitetin e këtij parlamenti. Pushteti absolut nuk mund të prodhojë situata të tjera përveç këtyre që po shohim. Edi Rama i ka dhënë provat kur nuk e respektonte parlamentin, nuk shkonte në interpelanca, kishte bezdi komisionet hetimore dhe po ndërhyn në rregullore për t’i asgjësuar’, – tha Tomorri.
Sipas tij, me rritjen e pushtetit të tij, Rama tani synon të nxjerrë jashtë loje edhe vetë parlamentin.
‘Duke qenë se pushteti i tij sa vjen e forcohet më shumë, tani kërkon të nxjerrë jashtë loje parlamentin sepse e bezdis fjala. Ajo që duhet të jetë programi se si duhet të qeverisen shqiptarët në 4 vitet e ardhshme dhe që qytetarët të dëgjonin programin se çfarë do ndodhte me jetën e tyre në 4 vitet që vijnë, shkon e katandiset në një cirk dhe vë Diellën e cila thotë që, unë nuk jam antikushtetuese, dhe mos u bëni ç’njerëzor.’
Gazetari e quan këtë situatë tipike të regjimeve autoritare.
‘Regjimet prodhojnë cirqe, sepse një përqendrim kaq i madh pushteti nuk mund të bashkëjetojë me demokracinë dhe kjo është situata ku ka mbërritur Shqipëria. Një qeveri e cila nuk ka frikë fare, e kontrollon totalisht parlamentin dhe nuk i lë opozitës as të drejtën e vetme që është ajo e fjalës, sigurisht do të kalojë aty çfarë t’i dojë qejfi dhe në këtë vend askush nuk është më i sigurt për pronë e tij, nuk ka më të sigurta liritë e tij.’
Tomorri paralajmëron se përqendrimi i pushtetit ka pasoja të rrezikshme për vendin.
‘Historia e ka treguar me raste të pafund; përqendrimi i pushtetit do të çojë në këto situata. Kjo është ajo që po ndodh në Shqipëri dhe ajo që na mbetet është që të mos kemi pasoja të rënda nga oreksi i madh i Edi Ramës dhe trajtimi i vendit dhe institucioneve si një lodër nga Edi Rama.’ – tha Klodian Tomorri
