Një aksident automobilistik është regjistruar pasditen e kësaj të diele në aksin rrugor Elbasan-Peqin, pranë fshatit Papër.
Drejtuesi i një automjet tip “Volkswagen Passat” ka humbur kontrollin dhe makina është përmbysur në rrugë, siç shihet edhe në pamjet e publikuara nga JOQ, të dërguara nga dëshmitarë në vendngjarje.
Brenda mjetit udhëtonin tre djem. Fatmirësisht, asnjëri prej tyre nuk ka pësuar lëndime serioze. Sipas dëshmitarëve, mjeti dyshohet se ka qenë me shpejtësi, ka rrëshqitur dhe është përplasur anës rrugës duke përfunduar i përmbysur.
Policia ndodhet në vendngjarje dhe ka nisur hetimet, ndërsa shkaqet e aksidentit mbeten ende të paqarta.
