Policia e Shtetit vijon operacionin anti-kanabis të koduar “Koordinata”, ku së fundmi ka zbuluar të kultivuara 12 957 bimë narkotike kanabis sativa, në njësinë administrative Kastrat, në fshatrat Alijaj dhe Jeran të Malësisë së Madhe.
Po ashtu, raportohet se uniformat blu kanë sekuestruar edhe 1000 fara kanabisi, 709 kilogramë lëndë narkotike në formë boçeje dhe 3934 kg bimë në proces tharjeje.
Si rezultat i këtij operacioni janë arrestuar 14 persona, janë shpallur në kërkim 10 të tjerë, si dhe janë proceduar penalisht në gjendje të lirë një vajzë dhe një grua.
Më konkretisht, në pranga janë vënë shtetasit Elez Çulaj, 77 vjeç; Muho Çulaj, 72 vjeç; Fatmir Senaj, 57 vjeç; Drita Senaj, 53 vjeçe; Rezarta Jacaj, 36 vjeçe; Kujtim Laçaj, 60 vjeç; Elfajed Halaj, 26 vjeç; Agron Laçaj, 50 vjeç, Adrian Çekaj, 22 vjeç; Gjelin Çekaj, 48 vjeç; Miranda Çekaj, 25 vjeçe, Pjetër Çekaj, 66 vjeç; Çun Halaj, 70 vjeç dhe një 17-vjeçar.
Ndërkohë, në kërkim janë shpallur shtetasit A. Ç., 54 vjeç; G. U(C)., 38 vjeç; D. Ç., 33 vjeç; Sh. Ç., 49 vjeç; Gj. Ç., 50 vjeç; E. H., 33 vjeç; M. H., 37 vjeç; E. H., 40 vjeç; M. H., 46 vjeç; A. H., 35 vjeç. Ndërsa, janë proceduar penalisht në gjendje të lirë shtetaset L. N., 53 vjeçe dhe N. N., 25 vjeçe.
“Nga hetimet dyshohet se këta shtetas kanë kultivuar 12 597 bimë të dyshuara narkotike, të llojit Cannabis Sativa, në fshatrat Alijaj dhe Jeran, pranë banesave të tyre. Bimët narkotike u asgjësuan me anë të djegies, ndërsa gjatë kontrolleve në banesa u gjetën edhe sasi të konsiderueshme lënde narkotike në faza të ndryshme përpunimi.
Nga kontrollet në banesat e tyre u gjetën dhe u sekuestruan në cilësinë e provës materiale 1000 fara kanabis dhe 4685 kilogramë lëndë narkotike, në formë boceje dhe një sasi në proces tharjeje. Vijon puna intensive përkapjen e shtetasve të shpallur në këkrim.” – thuhet në njoftimin e autoriteve.
Materialet procedurale i kanë kaluar Prokurorisë së Shkodrës për veprime të mëtejshme.
