Një 23-vjeçar shqiptar është arrestuar nga policia italiane në Umbria, i akuzuar për trafikim të lëndëve narkotike. Brenda makinës së tij u gjetën rreth 20 gramë kokainë, të ndara në 37 doza, dhe 780 euro në para të gatshme, të supozuara nga trafiku i drogës.
Mediat italiane, kanë ngritur shqetësimin për shtimin e rasteve të trafikut të drogës, ku përfshirja e të rinjve shqiptarë ka arritur nivele shqetësuese. Sipas tyre, shumica e të rinjve të kapur në rajonin e Umbrisë janë të përqendruar në aktivitete intensive shpërndarjeje droge dhe veprojnë në zona të vogla rajonale.
Operacionet e fundit kanë evidentuar një seri arrestimesh gjatë muajit gusht: më 13 gusht një 24-vjeçar shqiptar u ndalua në Perugia me 16 gramë kokainë, më 14 gusht një 25-vjeçar shqiptar në Bastia Umbra u kap me 10 pako kokainë dhe para, më 20 gusht një tjetër 25-vjeçar në të njëjtin qytet u arrestua me të njëjtat sasi. Më 21 gusht në Perugia një 27-vjeçar shqiptar u ndalua me 67 gramë kokainë dhe 4,700 euro para të gatshme, ndërsa më 25-26 gusht një 21-vjeçar shqiptar u kap me 18 gramë kokainë dhe 1,000 euro.
Përveç arrestimeve, autoritetet kanë ndjekur dhe procedurat e dëbimit për disa persona, duke përfshirë një 21-vjeçar shqiptar i riatdhesuar më 27 gusht nga Terni.
Gazeta italiane thekson se këto raste të rinjsh shqiptarë janë më të dukshmet, por shqetësimi real qëndron tek rrjetet më të fshehta që lëvizin sasi të mëdha droge në territor, duke përdorur metoda më të menaxhueshme dhe të vështira për tu zbuluar.
