Policia e Sarandës ka dhënë detaje nga aksidenti tragjik në aksin rrugor Delvinë-Sarandë, që i mori jetën dy motrave Dhimaku.
Sipas policisë, një makinë e drejtuar nga një i ri 23-vjeçar është përplasur me makinën që udhëtonin dy motrat.
Si pasojë e përplasjes, humbi jetën Elvisa Dhimaku, e cila ka qenë drejtuese e mjetit dhe Rozina Dhimaku pasagjere. Ndërsa Antonela Zhupa mbeti e plagosur.
“Sot, rreth orës 20:15, në aksin rrugor Delvinë-Sarandë, shtetasi K. N., 23 vjeç, duke drejtuar automjetin tip “Audi”, është përplasur me automjetin tip “Lancia”, me drejtuese shtetasen E. Dh. Si pasojë e aksidentit, kanë humbur jetën drejtuesja e automjetit “Lancia”, shtetasja E. Dh., 22 vjeçe, së bashku me pasagjeren shtetasen R. Dh., 20 vjeçe, ndërsa pasagjerja tjetër në këtë automjet, shtetasja A. Zh., 24 vjeçe, ka mbetur e dëmtuar dhe ndodhet nën kujdesin e mjekëve”, njofton Policia.
