Një operacion i SPAK ka çuar në goditjen e një grupi kriminal me shtrirje ndërkombëtare, i cili dyshohet se ka trafikuar mbi 6 ton kokainë nga Amerika Latine drejt vendeve të Bashkimit Europian dhe Mbretërisë së Bashkuar, me një vlerë tregu prej rreth 411 milionë euro.
SPAK ka firmosur urdhër-arreste për shtatë persona, mes tyre Artur dhe Klevis Hoxhosmani, Ermir Ndreaj – pronar i disa bizneseve – si dhe Ilir Lloshi.
Ndërkohë, Plarent Dervishaj, i akuzuar më parë për atentatin ndaj ish-prokurorit Arjan Ndoja, dhe Erion Alibej, i lidhur me disa atentate mafioze, janë njoftuar për akuzat në ambientet e paraburgimit. Një tjetër person është shpallur në kërkim ndërkombëtar.
Nga hetimet e deritanishme rezulton se kokaina vinte kryesisht nga Santa Marta (Kolumbi) dhe Ekuadori, përmes kontejnerëve detarë që mbërrinin në portet e Anversit (Belgjikë) dhe Roterdamit (Holandë). Prej andej, droga shpërndahej drejt Francës dhe më pas në Britaninë e Madhe, si dhe në disa raste në Itali dhe Spanjë.
Lënda narkotike fshihej në paleta me dru, kuti bananesh, dhe thasë me kokrra kakaoje, për të shmangur zbulimin nga autoritetet doganore.
Grupi përdorte gjithashtu një rrjet të gjerë bashkëpunëtorësh për të siguruar logjistikën, transportin dhe shpërndarjen në destinacion.
Pagesat për sasinë e drogës bëheshin përmes sistemit informal të transfertave ‘Hawala’, ndërsa grupi kishte akses në struktura doganore falë lidhjeve me individë në porte dhe agjenci të kontrollit në disa shtete europiane.
LEXO EDHE:
