Kombëtarja kuqezi e Shpresave, e drejtuar nga Alban Bushi, ka humbur pasditen e sotme, me rezultatin minimal 1-0 nga Turqia në miqësoren e zhvilluar në Stamboll. Kjo humbje vjen pak ditë pas asaj fitore 1-2 në miqësoren përballë Hungarisë në transfertë.
Ndeshja e sotme u vendos në minutën e 27-të të takimit, kur talenti i Beshiktashit, Semih Kilicsoy, realizoi një gol mjaft të bukur me një goditje fluturimthi brenda zonës, duke shtangur portierin Simon Simoni.
Pavarësisht tentativave dhe përpjekjeve të shumta, kuqezinjtë e Shqipërisë U21, nuk arritën të gjenin rrugën e rrjetës në këtë duel.
Shqipëria U-21 e nisi ndeshjen me këtë formacion titullar: Simon Simoni (C), Ermis Selimaj, Ervin Bashi, Gabriel Ramaj, Kevin Dodaj, Etnik Brruti, Rrok Toma, Aidon Shehu, Arlind Kurti, Enes Osmani, Dion Ajvazi. Në fraksionin e dytë të lojës u aktivizuan edhe Feta Fetain, Erald Maksutin, Burak Alilin, Zylyf Mucan, Fabjan Perndrecan dhe Dario Dakan.
