Ka përfunduar numërimi i votave të diasporës sa i përket subjekteve politike për të 12 Qarqet e vendit, ku Qarku i fundit për të cilin po numëroheshin zarfet e ardhura nga Greqia ishte Korça.
Sa i përket këtij Qarku, PS ka arritur të marrë 10 887 vota gjithësej nga diaspora, kundrejt 3 369 votave të PD-së, por gjithsesi nuk ka patur ndryshime sa i përket mandateve, duke u ndarë në 6-4 në favor të socialistëve.
Edhe në Qarkun e Korçës, ashtu si edhe në Qarqet e tjera, numri i votave të numëruara ishte më i madh se sa numri i të regjistruarve në KQZ, duke ngritur dyshime për manipulim të procesit, ashtu siç pretendon edhe Partia Demokratike.
KQZ raporton 16 753 zarfa të numëruara për Korçën nga 16 525 gjithësej, ndërkohë sa i përket të përgjithësshmes, KQZ raporton 201 897 zarfa të numëruar nga 198 459 gjithësej të regjistruar.
Edhe PS thelloi diferencën frikshëm me votat e diasporës, duket se ndikim në mandatet pati vetëm tek Qarku i Vlorës, aty ku që në fillim çoi rezultatin në 9-3 në favor të PS-së.
Gjithësej, Partia Socialiste arriti të fitojë 83 mandate, ndërsa Partia Demokratike vetëm 50 mandate. Deputetë do të futen në Kuvend edhe nga partitë e vogla dhe të reja, ku 3 mandate u fituan nga Partia Social-Demokrate e Tom Doshit, 2 mandate nga Partia Mundësia e Agron Shehajt, dhe nga një mandat secila “Nisma Shqipëria Bëhet” e Adriatik Lapajt dhe Lëvizja Bashkë e Arlind Qorit.
Më poshtë, numrat e votave për secilën parti, sa i përket brenda vendit, të diasporës dhe gjithësej.
- Partia Socialiste – 733 587 (52.14 %) vota brenda vendit – 122 054 (61.13 %) vota nga diaspora – 855 641(53.26%) vota gjithësej – (83 mandate)
- Partia Demokratike – 482 086 (34.27 %) vota brenda vendit – 47 017 (23.55 %) vota nga diaspora – 529 103 (32.94 %) vota gjithësej – (50 mandate)
- Nisma Shqipëria Bëhet – 49 438 (3.51 %) vota brenda vendit – 14 786 (7.41 %) vota nga diaspora – 64 224 (4.00 %) vota gjithësej – (1 mandat)
- Partia Social-Demokrate – 47 555 (3.38%) vota brenda vendit – 2 326 (1.16 %) vota nga diaspora – 49 881 (3.10 %) vota gjithësej – (3 mandate)
- Partia Mundësia – 43 069 (3.06 %) vota brenda vendit – 5 926 (2.97 %) vota nga diaspora – 48 995 (3.05 %) vota gjithësej – (2 mandate)
- Lëvizja Bashkë – 20 274 (1.44 %) vota brenda vendit – 4 344 (2.18 %) vota nga diaspora – 24 618 (1.53 %) vota gjithësej – (1 mandat)
- Kolaicioni Euroatlantik – 20 851 (1.30 %) vota gjithësej – (0 mandate)
- Koalicioni Djathtas për Zhvillim – 6 022 (0.37 %) vota gjithësej – (0 mandate)
- Partia Aleanca Kombëtare Shqiptare – 3 786 (0.24 %) vota gjithësej – (0 mandate)
- Lëvizja Atdheu – 2 255 (0.14 %) vota gjithësej – (0 mandate)
- Partia Aleanca Demokracia e Re – 1 126 (0.07) % vota gjithësej – (0 mandate)
