Policia e Tiranës ka goditur një rast të aktivitetit kriminal të shpërndarjes së drogave të forta dhe si rezultat ka arrestuar një person.
Në kuadër të operacionit policor të koduar “Mesnata” është vënë në pranga shtetasi I. Rr., 26 vjeç, banues në Tiranë, i cili dyshoihet se shpërndante doza kokaine në kryeqytet.
“Në rrethrrotullimin e Rinasit, pas mesnate, shërbimet e Policisë kanë ndaluar automjetin me drejtues shtetasin I. Rr. Gjatë kontrollit fizik dhe në automjet, u gjet një sasi kokaine, një pjesë e ndarë në doza, gati për shitje, dhe 3180 euro dhe 48 000 lekë. Nga hetimet ka rezultuar se ky shtetas, pasi siguronte lëndë narkotike, e shpërndante atë në doza, në zona të ndryshme të Tiranës.” – njofton Policia.
Materialet i kanë kaluar Prokurorisë së Tiranës për veprime të mëtejshme procedurale.
