Rusia i është përgjigjur deklaratave të Emmanuel Macron, i cili shprehu gatishmërinë për të diskutuar zgjerimin e mbrojtjes bërthamore franceze për aleatët europianë.
Ministri i i jashtëm rus Sergei Lavrov tha se ky është një kërcënim për vendin e tij dhe i hodhi poshtë akuzat se Rusia po përgatitet për luftë ndaj Europës.
“Ky është një kërcënim për Rusinë. Nëse ai Macron na konsideron një kërcënim, thërret një takim të shefave të shtabit të përgjithshëm të vendeve evropiane dhe Britanisë, thotë se është e nevojshme të përdoren armë bërthamore, të përgatitemi për të përdorur armë bërthamore kundër Rusisë, ky, natyrisht, është një kërcënim.”
Lavrov tha gjithashtu se vendosja e mundshme e forcave paqeruajtëse evropiane në Ukrainë do të nënkuptojë një përfshirje të drejtpërdrejtë, zyrtare dhe të hapur të vendeve të NATO-s në një luftë kundër Federatës Ruse.
Zëdhënësi i Kremlinit Dmitry Peskov i quajti deklaratat e presidentit francez jashtëzakonisht konfliktuale. Ai e akuzoi Francën se nuk mendon për paqen, por për vazhdimin e luftës.
Macron tha të mërkurën se do të diskutojë me aleatët evropianë mundësinë e përdorimit të parandalimit bërthamor të Francës për të mbrojtur kontinentin nga kërcënimet ruse.
Ai tha se situata për Europën mund të ndryshojë në rast se Shtetet e Bashkuara nuk mbajnë anën e saj dhe theksoi se kontinenti i vjetër duhet të jetë i përgatitur. Britania dhe Franca janë të vetmet shtete europiane që zotërojnë arsenal bërthamor.
