Ditën e nesërm (28 Shkurt) në Greqi pritet të mbahet një protestë dhe grevë kombëtare për tragjedinë e Tempit, të regjistruar më 28 shkurt 2023, kur u përplasën dy trena dhe ku humbën jetën 57 persona.
Grevat e punonjësve në Greqi prekin edhe Shqipërinë, pasi do të kufizohet qarkullimi i automjeteve në pikat doganore. Policia e Gjirokastrës bën me dije se nesër nga ora 07:00 deri në orën 23:00, në pikën kufitare të Kakavijë, nuk do të ketë lëvizje të automjeteve, për shkak të grevës së doganierëve grekë.
Raportohet se do të lejohen të kalojnë vetëm këmbësorët, mjetet e transportit të produkteve që prishen dhe automjetet që do kenë emergjenca shëndetësore. E njëjta situatë do të jetë edhe në pikën doganore të Qafë Botit.
“Policia Kufitare është njoftuar nga pala greke, se më datë 28.02.2025, nga ora 07:00 deri në orën 23:00, në PKK Kakavijë, nuk do të ketë lëvizje të mjeteve, për shkak të grevës së doganierëve grekë.
Do të lejohen të qarkullojnë vetëm këmbësorët, mjetet e transportit të produkteve që prishen dhe automjetet që do kenë emergjenca shëndetësore”, njofton policia.
