Ditën e sotme është mbajtur seanca e radhës për të pandehurit e dosjes “Plumbi i Artë” me dëshmitë e të penduarit të drejtësisë, Nuredin Dumani, ku ka patur tensione dhe debate të forta.
Një prej të akuzuarve, Enver Diva ka akuzuar Nuredin Dumanin se është paguar nga dy biznesmenë dhe dy deputetë për të vrarë Talo Çelën, por i penduari i SPAK e ka mohuar këtë deklaratë.
Dumani u shpreh: “Unë për vrasjen e vëllait të Talos nuk mora asnjë lek, sepse u përfshiva për hakmarrje, pasi u vra Klevis Kapllani, lekët për vrasjen e Bujar Çelës i kanë sjellë të nesërmen në Vorë, me një makinë, pagoi Erjon Alibej”.
Enver Diva, pasi mohoi përfshirjen e tij në vrasjen e Bujar Çelës, i kërkoi Dumanit të tregojë deputetët që, sipas tij, kërkuan vrasjen e Talo Çelës dhe i kanë dhënë një çantë me para.
“Cilët kanë qenë ata deputetë dhe biznesmenë që ke ardhur ke takuar me mua. Kanë ardhur 2 biznesmene dhe 2 deputetë dhe kanë thënë ‘gjallë a vdek e duam të vrarë Talo Celën’ dhe i kanë dhënë një çantë me lekë? Le t’i thotë ky. Unë”.
Vetë Dumani mohoi këtë fakt. “Nuk është e vërtetë kjo”, reagoi i penduari, ndërsa Diva nuk tregoi emrat e deputetëve, as kur u pyet nga prokurori, por duke shtuar “në një moment tjetër i tregoj, po në parlament i keni”.
Nuk dihet se sa e vërtetë është deklarata e Enver Divës ndaj Nuredin Dumanit, pasi është një akuzë e fortë që prek edhe politikën.
