Vendimi i kryeministrit Edi Rama për të ndryshuar foton e profilit dhe imazhin e kopertinës në Facebook me flamingo ka shkaktuar reagime të shumta në rrjetet sociale.
Lëvizja e kreut të qeverisë vjen në një kohë kur protestat kundër tij kanë hyrë në ditën e 26-të dhe mijëra qytetarë vijojnë të kërkojnë dorëheqjen e tij.
Flamingot janë kthyer në një simbol të rezistencës qytetare, të lidhur fillimisht me kundërshtitë ndaj projekteve të zhvillimit në zonën e Zvërnecit dhe Nartës.
Ndryshimi i profilit nga Rama u interpretua nga shumë komentues si një përpjekje për të ironizuar ose përvetësuar simbolin e protestës.
Brenda pak minutash, profili i kryeministrit u mbush me komente kritike, ku qytetarët i kërkonin të jepte përgjigje për kërkesat e protestuesve dhe të merrte përgjegjësi politike për situatën.
Mes reagimeve nuk mungoi as ai i deputetes Marjana Koçeku, e cila zgjodhi t’i përgjigjej me ironi kryeministrit.
Përmes një postimi në rrjetet sociale, ajo publikoi një imazh të modifikuar të një prej kullave më të diskutuara që po ndërtohet në qendër të Tiranës, pranë Teatrit të Operas dhe Baletit.
Kulla në fjalë është komentuar shpesh nga qytetarët për ngjashmërinë që, sipas tyre, ka me portretin e Edi Ramës.
Koçeku e vendosi foton mbi një sfond rozë, në një referencë të qartë ndaj flamingove të përdorura nga kryeministri dhe e shoqëroi me mesazhin ironik: “Mund t’ia sugjeroni për foto profili”.
