Ish-kreu i Partisë Demokratike, Lulzim Basha ka reaguar pas aksionit të SPAK për të arrestuar kryebashkiakun e Tiranës, Erion Veliajn.
Gjatë reagimit në rrjetet sociale, Basha përshëndet punën e SPAK-ut për të goditur bashkinë e Tiranës të cilën e etiketon si “lavatriçen e pastrimit të parave”.
Gjithashtu Lulzim Basha kërkon dorëheqjen e kryeministrit Edi Rama.
“Nën drejtimin e Erion Veliajt dhe me mbështetjen e Edi Ramës, Bashkia e Tiranës u kthye në një vatër korrupsioni dhe në lavatriçe të parave të pista, në shërbim të një grushti të vogël njerëzish, jo të qytetarëve.
Përshëndes vendosmërinë e SPAK për t’i shkuar deri në fund aferave korruptive dhe inkurajoj institucionet e drejtësisë të veprojnë pa asnjë hezitim kundër korrupsionit në nivelet e larta, që shkatërron mirëqenien e familjeve shqiptare.
E teksa numri i bashkëpunëtorëve të ngushtë të Edi Ramës, që popullojnë sot bankat e të akuzuarve vetëm rritet, për çdo shqiptar është e qartë, se kryeministri ose është i paaftë për t’u përballur dhe për të ndaluar korrupsionin, që vetëm ai nuk e ka parë në këto vite pranë tij, ose është bashkëpunëtor i të korruptuarve në vjedhjen e miliarda eurove.
Në të dyja rastet ai duhet të largohet.
Fundi i pandëshkueshmërisë është fundi i tranzicionit në Shqipëri!“, shkruan Basha.
