Kryeministri Edi Rama gjatë një komunikimi në rrjetet sociale, ka sulmuar në mënyrë indirakte ish-zv.kreministrin Arben Ahmetajt, duke shmangur përgjegjesinë nga vetja.
Rama tha se është Partia Socialiste që po lufton për të bërë shtet, por sipas tij edhe në PS, ka njerëz që i përkasin drejtësisë dhe jo forcës politike që ai drejton, duke thumbuar kështu Ahmetajn, i cili ndodhet në arrati, pasi ndaj tij ka një urdhërarrest të lëshuar nga SPAK.
Ndërsa gjithashtu kryeministri theksoi se Reforma në Drejtësi është meritë e PS.
“Sa i përket drejtësisë mendoj se kam shumë për të thënë. Ka një diskutim që jo u fut ky në burg, jo u fut ai, jo po dënohet ky e ai, dhe këto faturohen si faje, apo si përgjegjësi apo e metë e PS-së. Por pa PS-në, pa vullnetin tonë kurrën e kurrës nuk do të ndodhte kjo që po ndodh që drejtësia të çlirohet nga kthetrat e pushtetit politik të pavarësisht nga pushteti politik dhe të veprojë pavarësisht se cilës anë i përket njëri apo tjetri.
Nuk ka ndodhur në historinë e shtetit shqiptar që nga viti 1912 deri kur bëmë reformën në drejtësi që të ketë 1 të vetëm person të lidhur me pushtetin politik që të jetë vendosur para një drejtësie të pavarur. Fatos Nano u dënua nga një gjykatë politike, s’po flasim për këtë, por për institucione të pavarësua. Kjo është një arritje historie e PS dhe as nuk duhet të diskutohet fare se këtu në Shqipëri ka vetëm një parti që po lufton për të bërë shtet. Si çdo pyll që ka derrat e vet, edhe PS ka në këtë proces njerëz individë që për fat të keq i përkasin drejtësisë dhe jo rrugës së PS. Por, sot ka më pak korrupsion sepse sot nëse do të kishte më shumë korrupsion nuk do ishim ulur në tryezën e negociatave të BE”, tha Rama.
