Gjykata e Posaçme shtyn seancën gjyqësore të shqyrtimit në themel të të pandehurve për inceneratorin e Tiranës, e planifikuar për t’u mbajtur ditën e sotme.
Shkak i shtyrjes u bë mungesa në sallë e prokurorit të SPAK, Dritan Prençi, i cili u tha se ndodhej në një angazhim jashtë vendit. Seanca e radhës është caktuar që të mbahet më 31 Janar.
Për dosjen në fjalë janë marrë të pandehur 12 persona, ku vetëm 3 prej tyre kanë kërkuar gjykim të shkurtuar, më konkretisht Silena Tola, Alba Thoma dhe Pëllumb Abeshi.
Ndërsa të pandehurit e tjerë, Lefter Koka, Erjon Murataj, Bledar Karoli, Taulant Tusha, Namik Simixhiu, Etleva Kondi, Valbona Ballgjini, Sidita Kopliku dhe Jetmir Llapaj do të vazhdojnë me procedurën e gjykimit të zakonshëm.
Zyrtari më i lartë që është marrë i pandehur për këtë çështje është ish-ministri i Mjedisit, Lefter Koka, i cili është dënuar edhe për inceneratorin e Fierit dhe të Elbasanit. Të pandehurit e tjerë janë zyrtar të nivelit më të ulët.
Ndërkohë, çështja për ish-sekretarin e Përgjithshëm të Ministrisë së Mjedisit Alqi Bllako për inceneratorin e Tiranës është ndarë më vete. Sa i përket dy biznesmenëve Klodian Zoto dhe Mirel Mërtiri, ata vazhdojnë të jenë ende në kërkim.
Opozita i ka konsideruar hetimet e SPAK për inceneratorin si të cunguara dhe me “regji”, për sa kohë nuk merren të pandehur kryebashkiaku Erion Veliaj, sekretar i Përgjithshëm i Këshillit të Ministrave, Engjëll Agaçi dhe kryeministri Edi Rama.
