Policia e Tiranës bën me dije se gjatë krehjes së zonës ka gjetur në vendin e quajtur “Kodrat e Sharrës” një motor të djegur.
Sipas bluve të kryeqytetit, motomjeti dyshohet se i përket autorit të atentatit të regjistruar mbrëmjen e djeshme tek “Pallati me Shigjeta” ku u ekzekutua biznesmeni 56-vjeçar Bujar Nasufi.
Ndërkohë, ende nuk ka asnjë gjurmë të autorit, teksa Policia bën me dije se npën drejtimin e Prokurorisë së Tiranës po vijon puna për dokumentimin ligjor të ngjarjes, si dhe po kryhen të gjitha veprimet hetimore përkatëse me qëllim identifikimin dhe kapjen e autorit/ve.
Bujar Nasufit u qëllua brenda automjetit të tij, të cilin sapo e kishte parkuar pranë banesës. Autori, që ishte një i vetëm priti që nga makina të zbriste bashkëshortja e Nasufit, dhe menjëherë iu afrua dhe e qëlloi disa herë me armë zjarri 56-vjeçarin duke e lënë të vdekur në vend.
Të paktën 6 gëzhoja ka lënë në vendin e ngjarjes autori, teksa nga verifikimet ka rezultuar se ai ishte i kamufluar si shpërndarës picash dhe u largua me një motor të zi në drejtim të zonës së Selitës.
Lidhur me motivet e vrasjes, hetuesit po verifikojnë disa pista, mes të cilave ndonjë konflikt të mundshëm ku mund të jetë përfshirë viktima kohët e fundit.
Njoftimi i Policisë:
Në lidhje më ngjarjen e ndodhur mbrëmjen e djeshme ku u vra me armë zjarri shtetasi B.N, ju informojmë se: Në vendin e quajtur “Kodrat e Sharrës” gjatë krehjes së zonës, shërbimet e Policisë kanë gjetur një motomjet të djegur, i cili dyshohet se i përket autorit.
Vijon puna nën drejtimin e Prokurorisë, për dokumentimin ligjor të ngjarjes, si dhe po kryhen të gjitha veprimet hetimore përkatëse me qëllim identifikimin dhe kapjen e autorit/ve.
Grupi hetimor po kryen veprime intensive për sekuestrimin e çdo prove që do ti shërbejë hetimit për zbardhjen dhe dokumentimin ligjor, identifikimin dhe kapjen e autorëve.
