Opozita iu është rikthyer ditën e sotme sërish protestave para Bashkisë së Tiranës, ku ka mbajtur protestën e 41-të kundër Erion Veliajt dhe të parën për vitin 2025.
Eksponentë të opozitës dhe qytetarët kanë kërkuar sërish largimin e Erion Veliajt dhe vendosjen e tij para drejtësisë për inceneratorin e Tiranës, dosjen “5D” dhe për hetimet e fundit të nisura nga SPAK ndaj tij.
Në fillim të tubimit, pati dhe një përplasje të protestuesve me qytetarët e tjerë dhe drejtuesit e autotmjeteve që po kërkonin të kalonin në rrugën pranë godinës së Bashkisë, por me ndërhyrjen e Policisë situata u qetësua.
I pranishëm në protestë, aktori Neritan Liçaj i kërkoi Policisë që të merret me hajdutin, duke iu referuar Erion Veliajt, dhe jo me protestuesit, pasi sipas tij, kryebashkiaku do të ikë së bashku me paratë e vjedhura.
“Do na ikë hajduti dhe do marrë me vete edhe parat tona. O polici merruni me hajdutin, ç’punë keni me popullin. Ne dalim këtu ballazi. Nuk vrasim, nuk vjedhim si këta partia e Serbisë. Merruni me hajdutin se ai do ikë e do marrë edhe lekët tuaja ai. Për çfarë e bëni këtë mosbllokimin rrugës. Për të krijuar çarje shoqërore në mes nesh dhe atyre. Kë po përçani, popullin tuaj, jeni aty me flamurin shqiptar jo me flamurin e rilindjes. Ju duhet ti shërbeni popullit jo ta përçani. Është shumë e ndyrë. Tani për të folur për vjedhjet. I dimë të gjitha. Dhe po të mos ishte opozita këta do të vazhdonin të vidhnin.” – deklaroi Liçaj.
Ndërkohë, drejtuesi politik i PD-së për Tiranën, Belind Këlliçin deklaroi se ata do të protestojnë deri sa Erion Veliaj të shkojë para ligjit. Ai shtoi më tej se kryebashkiaku brenda 1 ore gjeti se kallëzuesi Nesti Angoni nuk ekziston dhe prej 7 vitesh nuk gjen se innceneratori i Tiranës nuk ekziston.
Ai i bëri apel dhe kreut të SPAK, Altin Dumani, ku sipas tij, si ka mundësi që ai mer parasysh dëshminë e një kallëzuesi anonim si Nesti Angoni dhe nuk merret me inceneratorin që nuk egziston.
“Kushdo që ka menduar se PD do të ndalet, përgjigjen e ka marrë sërish sot. Kush mendon se ndalemi ne? Ne nuk pushuam 333 ditë në protestë dhe do të pushojmë para kësaj proteste. Do të jemi këtu, njëlloj si Sali Berisha është sot mes nesh, njëlloj siç do të fitojmë zgjedhjet në 11 maj. Dhe po, ky është viti jonë, ky është viti i shqiptarëve. Do të jemi këtu, deri sa keqbërësi, hajduti Erion Veliaj të shkojë para ligjit.
Viti që lamë pas prodhoi një fenomen të çuditshëm, që quhet Nesti Angoni apo Nesti Rama. Çfarë prodhoi Nesti Angoni. Pikësëpari nxorri zbuluar Erion Veliajn dhe Altin Dumanin. 1 orë pasi doli nga SPAK, Erion Veliaj në mbledhje të këshillit bashkiak deklaroi se, kishte hyrë në regjistrin e gjendjes civile, pra kishte bërë një vepër penale dhe ishte siguruar se Nesti Angoni nuk ekziston. Si ka mundësi që ti për 1 orë ti gjen se, Nesti Angoni nuk ekziston dhe ke 7 vite që nuk gjen inceneratorin e Tiranës që nuk ekziston.
Si ka mundësi Altin Dumani merr para sysh dëshminë e Nesti Angonit dhe nuk gjen dot inceneratorin e Tiranës që nuk ekziston prej 7 vitesh. Janë dhënë 132 mln euro Altin Dumani, Dritan Prençi. Sot paguajmë 80 mijë euro për një incenerator që nuk ekziston. Ose nëse nuk e gjeni dot, çoni Erion Veliajn tek shokët” deklaroi Belind Këlliçi gjatë fjalës së tij në protestë.
