Kreu i grupit parlamentar të PD-së, Gazment Bardhi i është përgjigjur komentit të kryeministrit Edi Rama në lidhje me protestën e deputetëve të Partisë Demokratike para Parlamentit Europian.
Përmes një postimi në rrjetet sociale, Bardhi shkruan se Edi Rama ka zgjedhur që ta bëjë “tangon” me krimin e organizuar që i vendos emrat në listën e kandidatëve për deputet, ndërsa sipas tij, opozita ka zgjedhur që ta bëjë “tangon” me interesin publik.
Gazment Bardhi: “Duhen dy për një tango pa asnjë diskutim! Dhe ti e ke zgjedhur dyshen tënde të tangos: krimin e organizuar. Ti ke vendosur të bësh tango me Altin Hajrin, që të dikton të 3 në listën e kandidatëve dhe ti i vendos firmën. Ti ke vendosur të bësh tango me Avdylajt, që të diktojnë të 5 në listën e kandidatëve dhe ti i vendos firmën. E ndërkohë që ti bën tango me krimin e organizuar, duke vallëzuar muzikën që krimi i organizuar dëshiron, opozita ka vendos të bëjë tango me interesin publik, për të vallëzuar çdo shqiptarë muzikën që përfaqëson vlerat europiane në qeverisje dhe që garanton mirëqenien e tyre.”
Kujtojmë se gjatë konferencës së përbashkët në Tiranës me presidenten e Komisionit Europian, Ursula von der Leyen, kryeministri Edi Rama u pyet edhe në lidhje me protestën e deputetëve të Partisë Demokratike para godinës së Parlamentit Europian.
Rama deklaroi se muzika e Bashkimit Europian është e shkruar në mijëra partitura me detyra konkrete, afate konkrete, me monitorim shumë të imtësishëm dhe me rezultate konkrete. Ai shtpi më tej se nuk do të qëndrojnë në vend dhe të vajtojnë situatën, por do të vazhdojnë përpara për të përmbushur detyrat dhe për ta futur Shqipërinë në Bashkimin Europian.
Edi Rama: Duhen dy për një tango thotë një fjalë, kështu që nëse nuk ka një dyshe për një tango, atëherë ka vetëm një muzikë që është muzika e Bashkimit Europian. Muzika e Bashkimit Europian është e shkruar në mijëra partitura me detyra konkrete, afate konkrete, me monitorim shumë të imtësishëm të këtyre detyrave dhe patjetër edhe me rezultate konkrete. Kështu që do të ishte shumë që të ndodhte ashtu siç ishte e dëshirueshme, por nga ana tjetër, ne nuk mund të qëndrojmë në vend dhe ta vajtojmë këtë situatë, por duhet të vazhdojmë përpara, të bëjmë detyra dhe siç arritëm ta ulim Shqipërinë në tryezën e çeljes së negciatave ta arrijmë ta ulim Shqipërinë dhe në tryezën e Këshillit Europian si një vend anëtar me të gjitha detyrat dhe të drejtat e veta si çdo vend anëtar. Unë kam shumë besim, më herët se sa vonë, kur ne ende do të jemi rrugës, edhe kjo që ju sollët në vëmendje, që Bashkimi Europian, krejt normalisht e pretendon nga çdo vend që pretendon të futet në shtëpinë e përbashkët do të ndodhi. Është fillimi i fundit të një histori shumë të gjatë dhe më herët se sa vonë, një histori e re do të fillojë dhe në këtë aspekt, por do të na duhet ende edhe ca durim.
