Sipas një artikulli i të publikuar nga mediat në Singapor, autoritetet vendase janë përballur me një situatë të ndërlikuar pas zbulimit të dy ngarkesave me mbetje toksike të padeklaruara që mbërritën në Singapor në gusht. Në artikull shkruher se këto ngarkesa, që u nisën fillimisht nga Shqipëria dhe më pas udhëtuan drejt Italisë, përmbanin pluhur të rrezikshëm nga furra e çelikut, i cili përmban metale të rënda si zinku dhe plumbi, të cilët mund të përbëjnë rrezik serioz për mjedisin dhe shëndetin publik nëse nuk trajtohen siç duhet.
Media vendase vuri në dukje se ngarkesat ishin transportuar me dy anije të kompanisë daneze të transportit, Maersk, dhe po drejtoheshin drejt Azisë Juglindore, një zonë që shpesh bëhet objekt i depozitimit të mbetjeve të paligjshme nga vende të ndryshme të botës. Media e Singaporit theksoi se Konventa e Bazelit, një traktat ndërkombëtar që synon të parandalojë trafikimin e mbetjeve të rrezikshme, u shkel në këtë rast, pasi sipas tyre as Shqipëria dhe as vendet e tjera të përfshira në rrugën e transportit nuk ishin informuar për përmbajtjen e rrezikshme të ngarkesës.
Pasi anijet arritën në Singapor, autoritetet vendase morën masa të menjëhershme për të siguruar kthimin e ngarkesave në vendin e origjinës, duke bashkëpunuar me kompaninë Maersk dhe palët e tjera përkatëse. Ndërkohë, situata ka nxitur një reagim të gjerë, duke përfshirë paralajmërimet nga organizata të ndryshme për rreziqet që vijnë nga transporti i paligjshëm i mbetjeve të rrezikshme dhe nevojën për një zbatim më të rreptë të rregullave ndërkombëtare për mbrojtjen e mjedisit dhe shëndetit publik.
