Teksa në ditët e fundit vendi është tronditur nga një sërë ngjarjesh kriminale, deputeti i PD, Ervin Salianji, përmes një statusi në Facebook, shkruan se halli më i madh i policisë politike është si të mbulojë, manipulojë dhe fshehë krimet!
Sipas tij, policia politizohet ‘për të dhënë mesazhin tek banditët që më kriminelët mbrohen’!
“Vetëm çlirimi i policisë nga prangat e krimit dhe rikthimi i saj në shinat e ligjshmërisë rikthen besimin tek punonjësit e policisë dhe e kthen policinë e shtetit në shërbim të interesave të qytetarëve dhe jo në interesa të bandave”, shkruan Salianji!
Salianji shkruan se ndërkohë që krimi ka marrë dhenë, ministri i Brendshëm as dihet ku është fshehur.
Postimi i plotë i Salianjit:
“Rendi dhe siguria publike në pikiatë, vrasjet, plagosjet, vjedhjet po bëjnë kërdinë ndërkohë që halli më i madh i policisë politike është si të mbulojë, manipulojë dhe fshehë krimet!
Policia e politizuar po politizohet dhe më tej, për të dhënë mesazhin tek banditët që më kriminelët mbrohen! Parandalim as që bëhet fjalë por policia nuk kap dot as kriminelët ordinerë, oligarkët e krimit ndërkohë emërojnë drejtuesit dhe caktojnë shefat e policisë!
Vetëm çlirimi i policisë nga prangat e krimit dhe rikthimi i saj në shinat e ligjshmërisë rikthen besimin tek punonjësit e policisë dhe e kthen policinë e shtetit në shërbim të interesave të qytetarëve dhe jo në interesa të bandave!
Ndërkohë që krimi ka marrë dhenë në rrugë ministri i Brendshëm as dihet ku është fshehur!”
