Prokuroria e Posaçme (SPAK) në bashkëpunim me partnerët amerikanë ka lëshuar 5 urdhër-arreste në kuadër të nj. procedimi penal të vitit 2023, të cilat janë ekzekutuar nga Policia e Shtetit.
Të arrestuarit kalonin në mënyrë të paligjshme, nëpërmjet dokumenteve false dhe mosregjistrimit në sistemin TIMS, nga pika doganore e Hanit të Hotit shtetas shqiptarë që kishin si destinacion Shtetet e Bashkuara të Amerikës dhe Kanadanë.
Në kuadër të operacionit të koduar “HOTI” është ekzekutuar masa e sigurisë “Arrest në burg”, për organizatorin e kësaj veprimtarie kriminale, shtetasin L. M., 56 vjeç, banues në Malësi të Madhe.
Ai akuzohet për veprat penale “Ndihma për kalim të paligjshëm të kufijve”, kryer në kuadër të grupit të strukturuar kriminal, “Kalimi i paligjshëm i kufirit shtetëror”, “Falsifikimi i letërnjoftimeve, i pasaportave dhe i vizave” dhe “Ushtrimi i ndikimit të paligjshëm ndaj personave që ushtrojnë funksione publike”.
Ndërkohë janë ekzekutuar dhe katër masa sigurie “Arrest në shtëpi”, për shtetasit: E. M., 24 vjeç dhe G. C., 49 vjeç, të dy banues në Malësi të Madhe, të akuzuar për veprën penale “Ndihma për kalim të paligjshëm të kufijve”, kryer në bashkëpunim.
Si dhe për shtetasit T. M., 55 vjeç, banues në Malësi të Madhe dhe B. C., 58 vjeç, banues në Shkodër, përkatësisht me detyra ndihmësspecialist, kontrollor i vijës së dytë në PKK Hani i Hotit dhe përgjegjës turni në PKK Hani i Hotit, të akuzuar për veprën penale “Shpërdorimi i detyrës”.
Autoritetet policore bëjnë me dije se gjatë kontrollit në banesat e shtetasve të mësipërm janë gjetur dhe sekuestruar 8125 euro, 625 000 lekë, 3060 dollarë amerikanë, 240 dollarë kanadezë, si dhe 17 celularë, 3 automjete, 1 USB, 21 fushekë, blloqe shënimesh, regjistra hyrje-daljesh, bileta udhëtimi, mandate pagesash dhe mandate bankash.
“Gjykata e Posaçme e Shkallës së Parë Kundër Korrupsionit dhe Krimit të Organizuar, me vendimin nr. 81 të datës 21.07.2024 dhe më vendimin nr. 453 të datës 21.07.2024, ka caktuar këto masa sigurie, pasi nga hetimet ka rezultuar se këta shtetas, në bashkëpunim me njëri-tjetrin, nëpërmjet dokumenteve false dhe mosregjistrimit në sistemin TIMS, kanë kaluar në PKK Hani i Hotit, shtetas shqiptarë që kishin destinacione Kanadanë dhe Amerikën.” – thuhet në njoftimin e Policisë.
Materialet procedurale i kaluan Prokurorisë së Posaçme Kundër Korrupsionit dhe Krimit të Organizuar, për hetime të mëtejshme.
