Deputeti i PD-së, Tomor Alizoti, ishte i ftuar në Syri tv, ku foli në lidhje me rezolutën anti-korrupsion të miratuar një ditë më parë në Kuvend nga socialistët, teksa opozita ka akuzuar se kryeministri Edi Rama synon kontrollin e SPAK-ut përmes këtij komisioni.
Alizoti u shpreh se drejtësinë nuk mund ta ndërtojë dikush që është i vëzhguar nga drejtësia dhe ruhet prej saj, teksa sipas tij, në një shtet autoritar nuk mund të flitet për drejtësi.
Deputeti demokrat shtoi më tej se të gjitha institucionet e drejtësisë i kanë marrë vulën opozitës pa asnjë provë dhe fakt dhe i kanë izoluar liderin e saj. Sipas tij, pushteti në Shqipëri është fytyra e Edi Ramës dhe të gjithë të tjerët janë shërbëtorë të tij.
Alizoti tha më tej se ndryshe nga PS, në PS që prej largimit të LSI nuk është krijuar më asnjë fraksion, duke e konsideruar këtë parti si repart ushtarak.
“Drejtësinë nuk mund ta ndërtojë dikush që është i vëzhguar nga drejtësia, dikush që duhet ti ruhet drejtësisë, sepse e menaxhon. Nëse ne flasim për një shtet autoritar, nuk flasim më për drejtësi. Sepse shteti autoritar është që, dëshira e liderit është vetë shteti dhe pjesa tjetër janë popull i marrë peng, siç bëri Enver Hoxha në 45 vite që bëri një shtet për të shtypur njerëzit e tij, për ti skllavëruar, që ata të punonin nga mëngjesi gjer në darkë që ky të mbretëronte dhe në fund me paratë e tyre paguante polici, gjykata e ushtri që të izolonte njerëzit e tij. Pushteti nuk e bën dot shtetin. Në demokraci institucionet duhet të jenë të pavarura, janë në oponencë, në konflikt me qeverinë.
Gjithë institucioni i drejtësisë sot i ka marrë vulën opozitës, pa asnjë provë, pa asnjë gjë, i ka izoluar liderin opozitës. Pushteti në Shqipëri po merr një fytyrë, pushteti është Rama, të gjithë të tjerët janë shërbëtorë të tij. Gjithçka që thotë ai në parlament, votohet 100% nga PS dhe aty nuk ka asnjë abstenim. Pushteti ka marrë komplet fytyrën e tij.
Në PD ka pasur fraksione të vogla, krijoheshin parti, bashkoheshin. Në PS që kur ka ikur LSI-ja nuk ka ndodhur më gjë. PS është një repart ushtarak”, tha Tomor Alizoti
