Kuvendi ditën e djeshme miratoi me 76 votat e socialistëve rezolutën “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Europian”.
Bëhet fjalë për propozimin e socialistëve për ngritjen e një komisioni të posaçëm parlamentar për të forcuar luftën kundër korrupsionit dhe shtetin e së drejtës, por që është interpretuar si një tentativë e kryeministrit Edi Rama për të vënën nën kontroll SPAK-un dhe GJKKO-në.
Por, duket se kryeministrit Edi Rama nuk i pret puna dhe nuk ka humbur kohë, duke futur që në seancën plenare të së enjtes ngritjen e Komisionit të Posaçëm, e cila është në pikën 7 të rendit të ditës së punimeve të Kuvendit.
“Projektvendimi “Për ngritjen e Komisionit të Posaçëm për Thellimin e Reformave për Mirëqeverisjen, Sundimin e Ligjit dhe Antikorrupsionin për Shqipërinë 2030 në Bashkimin Europian””, thuhet në njoftimin zyrtar nga Kuvendi.
Ngritja e këtij komisioni do të bëhet me shumicë të thjeshtë votash. Deri më tani nuk është e konfirmuar nëse opozita do t’i bashkohet apo jo këtij komisioni, teksa ditën e djeshme në Kuvend nuk mori pjesë në votim, ndërsa deputetët Dashnor Sula dhe Agron Gjekmarkaj votuan kundër.
Në krye të këtij komisioni, Edi Rama pritet të vendosë Fatmir Xhafajn, vëllain e trafikantit të drogës Geron Xhafaj, duke e kthyer sërish për t’i shërbyer, pasi e flaku disa vite më parë nga Ministria e Brendshme.
