Opozita dhe Aleanca për Mbrojtjen e Teatrit po mbajnë këtë të premte protestën e katërt para Bashkisë së Tiranës, ku kërkohet dorëheqja dhe marrja si i pandehur nga SPAK i kryebashkiakut Erion Veliaj, pas aferës korruptive “5D’, ku drejtorët e tij kryesorë kishin përfituar dhjetra miliona euro përmes tenderave të bashkisë.
Në protestën e sotme shihet një pjesëmarrje më e lartë e qytetarëve, ndryshe nga ajo e kaluara, e cila nuk ishte e favorizuar për shkak të kushteve atmosferike.
Për shkak të protestës, Policia ka ndërmarrë masën sot për të bllokuar qarkullimin e mjeteve në bulevardin kryesor pranë Bashkisë së Tiranës. Ndërkohë, edhe pse është ditë pune, dera kryesore e Bashkisë së Tiranës është rrethuar me barriera hekuri dhe një kordon policie është stacionuar për të penguar protestuesit që të mos mësyjnë në ambientet e brendshme të këtij institucioni të qeverisjes vendore.
Nga pamjet shihet se efektivët që formojnë kordonin, ndryshe nga tri protestat e mëparshme, këtë herë janë pajisur me maska kundërgazi, si dhe ka një numër më të lartë efektivësh.
Protestuesit kanë gjuajtur me vezë, portokallë dhe mollë drejt godinës së Bashkisë së Tiranës,. teksa më pas janë hedhur edhe disa molotovë drejt godinës së insitucionit. Siç shihet edhe në foto, tymi ka mbuluar pjesën hyrëse të bashkisë, pasi efektivët e Policisë kanë ndërhyrë në moment për t’i fikur ato.
Anëtarët e Këshillit Bashkiak të opozitës kanë tentuar sërish edhe sot të futen në godinëmn e Bashkisë së Tiranës. Ata i kanë kërkuar Policisë së Shtetit arsyet ligjore pse po i ndalojnë, por nuk kanë marrë përgjigje.
I pranishëm në protestë ka qenë edhe aktivisti Alfred Pëllumbi, i cili u arrestua pas protestës së kaluar, por u lirua më pas nga gjykata, e cila iua ndaloi të merrte pjesë në tubime të tjera. Gjithsesi, ai nuk i është bindur atij vendimi duke e konsideruar si vendim politik.
“Unë jam një nga ju, Alfred Pllumi, i arrestuat nga maskat kriminale të shokut Tao. Unë, një nga ju, se i vetëm sbëj dot gjë, sot erdha këtu sepse asnjë demokrat nuk trembet. Përveç demokratëve na janë bashkuar edhe socialistët e ndershëm të cilët e dinë të cilët e dinë që lali Eri është hipokrit, zvarranit, mashtrues. E vetmja shpresëe jotja për të përfunduar është dorëheqja. Dorëhiqu se nuk të mbron më asgjë.” – tha ai.
Ndërkohë, anëtari i Kryesisë së PD-së, Belind Këlliçi, gjatë fjalës së tij në protestë, i bëri thirrje Policisë që të mos arrestojë protestuesit, por Erion Veliajn.
“Ndaloni dhunën ndaj qytetarëve dhe arrestoni hajdutët në bashki. I nderuar drejtues i policisë së shtetit që po flet me mikrofon. Merr masa që të arrestosh një hajdut që ka vjedhur 30 milionë euro nga taksat tuaja. Të nderura efektivë të policisë së shtetit, efektivë të policisë bashkiake, askush nga protestuesit nuk ka asgjë më ju përkundrazi jeni dëshmitarë se si jeni përdorur ndër vite për ti shërbyer biznesit personal të pronarit faktik të inceneratorit të Tiranës Erjon Veliaj. Jeni ju që jeni detyruar të rrini natën e të ndaloni pikata e pleqtë që sheshin një tufë majdanoz në rrugët e këtij qyteti për ti shërbyer biznesit privat të drejtorit të policisë së Tiranë Ermal Kapllanaj. U bë e katërta javë që sjell këtu këshilltarët bashkiakë të opozitës, në orar zyrtar pune, ditën e premte, të cilët kërkojnë të futen në institucionin e bashksië së Tiranës për të marrë përgjigje për kërkesat që kanë bërë për fondet e bashkisë Tiranë. Jemi në një ditë rutinë jave, në një ditë pune dhe ju e shihni mjaft mirë që dera e bashkisë Tiranë është e mbyllur është e lidhur me zinxhirë….” – tha Këlliçi.
Protestuesit kanë tentuar të çajnë kordonin e Policisë, ku ia kanë arritur të largojnë gardhin metalik të vendosur nga autoritetet. Aksioni është nisur nga anëtari i Këshillit Bashkia, Tedi Blushi, i cili me flamur në dorë, ka kërcyer mbi efektivët e Policisë, me ndihmën e qytetarëve.
Pas disa tensioneve mes protestuesve dhe Policisë, eksponentë të opozitës kanë tërhequr qytetarët dhe kanë mbyllur protestën e sotme.
Sekretari i Përgjithshëm i PD-së, Flamur Noka deklaroi nga oborri i selisë blu, se me kërkesë të qytetarëve, protesta e radhës kundër Bashkisë së Tiranës dhe kundër korrupsionit të Erion Veliajt do të mbahet ditën e martë në orën 16:30 të pasdites.
Arsyeja e ndryshimit të ditës dhe orës së protestës është për shkak se të martën në orën 16:30 do të mblidhet dhe Këshilli Bashkiak i Tiranës, si dhe për shkak se të premten e ardhshme janë Pashkët ortodokse.
