Policia e Shtetit ka marrë masa për protestën e nesërme në orën 10:00 përballë bashkisë së Tiranës ku qytetarët kërkojnë dorëheqjen e Erion Veliajt pas skandalit “5D” ku 5 drejtorë të këtij institucioni përfunduan në burg me akuzën për vjedhjen e miliona eurove.
Për shkak se kryebashkiaku socialist Erion Veliaj është i frikësuar nga molotovi dhe boja e hedhur në bashkinë e Tiranës, uniformat blu me “urdhër nga lart” i kanë bërë thirrje qytetarëve të distancohen nga aktet e dhunës pasi në të kundërt do t’i arrestojë.
Madje policia “kërcënon” qytetarëve se do të arrestojë të gjithë ata që shkelin ligjin duke u munduar në këtë mënyrë që të frikësojnë protestuesit.
Kujtojmë që shoqëria civile së bashku me opozitë kanë protestuar dy herë të tjera përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
Të premten e kaluar protestuesit kanë hedhur bojë të zezë në drejtimin të godinës që administrohet nga Erion Veliaj, kurse patronazhistët me “mision special” kanë hipur sipër institucionit për të fotografuar qytetarët dhe më pas policia të kryente lirshëm arrestimet politike.
Reagimi i plotë i policisë:
“Policia e Shtetit bën me dije se, ka marrë masa organizative dhe operacionale për garantimin e rendit publik dhe sigurisë gjatë zhvillimit të një tubimi të kërkuar nga Aleanca për Mbrojtjen e Teatrit, ditën e premte, 26 prill 2024, ora 10:00, pranë Bashkisë së Tiranës.
Në zbatim të planit të masave, Policia e Shtetit njofton se, ditën e nesërme, në orën 09:45 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.
Gjatë dy tubimeve të fundit, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë.
Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u bën thirrje organizatorëve, drejtuesve dhe pjesëmarrësve në tubime të respektojnë ligjin dhe të distancohen nga çdo akt dhune.
Cenimi i rendit e sigurisë publike dhe rrezikimi i shëndetit e jetës së punonjësve të policisë përbëjnë shkelje të ligjit dhe Policia e Shtetit do të veprojë gjithnjë me profesionalizëm”, njofton policia.
- Çfarë ndodhi me protestuesit e arrestuar të premten e kaluar?
Gjykata e Tiranës ka liruar nga qelia katër protestuesit e opozitës të cilën morën pjesë në tubimin e ditës së premte ku kërkuan dorëheqjen e kryebashkiakut Erion Veliaj pas aferës “5D”.
Sipas vendimit të Gjykatës, katërt protestuesit e arrestuar janë lënë në “detyrim paraqitje” dhe ndalim pjesëmarrje në tubime.
Kevin Vidrica, Bernard Metaliaj, Franc Kaloshi dhe Artan Muçmata, janë protestuesit që janë liruar nga qelia, të cilët akuzohen për përdorim të lëndëve piroteknike dhe kundërshtim të punonjësve të policisë.
Vlen të theksojmë që policia nisi arrestimet menjëherë pas protestës duke mësyrë në orët e mesnatës deri mëngjesin e të shtunës në banesat e protestuesve për të bërë arrestimin e tyre.
